BJP in Candidate 23 hming an puangchhuak

BJP Mizoram chuan Mizoram Legislative Assembly inthlanpui 2023 lo awm tur atan Constituency 23-a an Party Official Candidate tur nimin khan an puang a, Serchhip Bial-ah K. Vanlalruati chu a ding dawn a ni.

Aizawl-a BJP Office-a an Candidate tur puanna hunah hian BJP Mizoram Pradesh President Vanlalhmuaka chuan Candidate turte hi puangin kum 2023-ah BJP in a mala Sawrkarna an siam lo anih pawhin BJP tel lovin Sawrkar a piang dawn lo niin a sawi a, “Sawrkarna siam turin kan inbuatsaih a, kan Sawrkar dawn a ni tih sawi thei awmchhun Party chu BJP chiah kan ni a, Party dang chuan an la sawi thei ve hrih lo a ni,” a ti bawk.

BJP in nimin-a an Candidate tur an puanchhuah ah hian Serchhip Bial-ah K. Vanlalruati (Tlangnuam Aizawl) a ding dawn a, Hrangturzo bial-ah Lalmalsawma (Serchhip Darnam Veng) a ding dawn bawk a. Heng bakah hian an President Vanlalhmuaka chu Dampa Bial-ah dingin tunhnaia Speaker leh MLA atanga banga BJP zawmtu Lalrinliana Sailo chu Mamit Bial-ah a ding dawn a, Siaha bialtu MLA atanga bangta K. Beichhua pawh a bial ngaiah a ding leh dawn bawk a ni. Heng bakah hian Hachhek Bial-ah Malsawmtluanga dingin Tuirial Bial-ah F. Vanhmingthanga; Kolasib Bial-ah R. Lalthangliana; Serlui Bial-ah Robinson Malsawmtluanga Hmar; Tuivawl Bial-ah Judy Zohmingliani leh Chalfilh Bial-ah Dr. Zonuntluanga te an ding ang. Aizawl North-III ah Chawnghmingthanga; Aizawl South-I ah F. Lalremsangi; Lengteng Bial-ah B. Suanzaleng; Champhai North-ah PS. Zatluanga; Lunglei West Bial-ah R. Lalbiaktluangi; Lunglei South-ah T. Biaksailova; Thorang Bial-ah Shanti Bikash Chakma; West Tuipui Bial-ah T. Lalengthanga; Tuichawng Bial-ah Durjya Dhan Chakma leh Palak Bial-ah K. Hrahmo te an ding dawn bawk a. Heng mite bak hi Candidate an siam a rinawm loh tih thudawnna pakhat chuan a sawi bawk.