Ni 3 awh tur ‘Young Voters' Festival’ hawngin ‘Serchhip District SVEEP Mascot’ phochhuah a ni

Ni thum chhung awh tur ‘Young Voters' Festival’ chu nimin khan Govt. Serchhip College-ah neih tan a ni a, Serchhip-a Election Officer Lalrinsanga Hnamte chuan he Festival hi hawngin Serchhip District SVEEP Mascot chu he hunah hian phochhuah nghal a ni.

Govt. Serchhip College Academic Building tual-a ‘Young Voters' Festival’ hawnna hunah hian Serchhip Election Officer Lalrinsanga Hnamte chuan democracy ram-a inthlan pawimawhzia sawiin, thalai Voters te ti phur tura Young Voters’ Festival huaihawt a ni chu lawmawm a tih thu a sawi a. Election Commission of India chuan voters zawng zawng ten vote an thlak ngei theihna turin tan a lak thu sawiin, Tar chak lo te, rualbanlo te, hrisel lohna avanga Polling Station thleng thei lo turte tan pawh ruahmanna a siam a nih thu a sawi a. Chutiangin, vote nei thar thalaite zingah pawh Systemic Voter Education and Electoral Participation (SVEEP) kaltlangin Electoral Literacy Club din a nih thu leh nasa takin tan lak mek a nih thu a sawi a. He huna kalkhawmte chu Festival hlim taka hmang tura duhsakna hlanin, he Festival in a tum ber, Vote thlak hlutzia hriaa, midangte hnenah pawh hrilh darh a, a Zirtirtu nih tum theuh turin Zirlaite chu a chah bawk.


Serchhip Election Officer chuan Serchhip District chhungah Assembly Constituency pathum (3) a awm thu sawiin, Polling Station 88 a awm thu a sawi a, Serchhip Bial-ah Polling Station 29, Tuikum Bial-ah 32 leh Hrangturzo Bial-ah 27 a nih thu a sawi a. Hmeichhe hlang in Inthlan an buaipuina Polling Station, Pink Polling Station tih thin chu ‘All Women Manage Polling Station’ tiin Assembly bial tinah pahnih theuh, a vaiin Polling Station paruk (6) a awm dawn thu a sawi a. Hei bakah hian ‘All Youth Manage Polling Station’ tia vuah kum naupang leh thalai zawk ten an enkawl tur Polling Station pathum (3) a awm dawn thu leh Critical Polling Station pahnih (Lungkawlh leh Sailulak) a awm dawn thu Election Officer chuan a sawi bawk a ni.

Nimin-a Young Voters’ Festival hawnna inkhawmah hian Serchhip DIPRO leh SVEEP Nodal Officer Lalnunmawii kaihhruaiin Serchhip District SVEEP Mascot Contest lawmman semna neih niin Laltluangliani (New Serchhip) chuan lawmman pakhat a dawng a, C. Lalchhanchhuahi (P&E Veng, Serchhip) in pahnihna leh Vanlalengfiaha (3rd Sem BA) in pathumna lawmman an dawng a ni.


Naktuk thlenga neih tur Young Voters' Festival-ah hian Extempore Speech, Quiz, Declamation Contest, Reels Making Contest, Selfie Contest, Hashtag Campaign, Signature Campaign, Flyer Making Contest, On the Spot Essay Writing Contest, On the Spot Slogan Writing Contest, On the Spot Painting Competition te zirlaite tan buatsaih a ni dawn a ni.

Young Voters’ Festival hawnna inkhawm nimin-a neih hi Govt. Serchhip College Principal C. Laldintluanga chuan kaihruaiin zirlai thahnem tak an tel a, he hunah hian inthlanna a Vote thlak pawimawh zia inzirtirna thuziak chi hrang hrang phochhuah a ni bawk. Serchhip District-ah hian Assembly Inthlan hnuhnung ber kum 2018-a neih ah khan Vote za zela 85 vel a tla a. Kumin ah hian za zela 90 (90%) tal Vote a tlak theih nan tan lak mek niin hemi atan hian SVEEP leh ELC tangkawp chuan ‘Project 90’ chak taka kalpuiin hmun hrang hrang inzirtirna te neih a ni.

Comments

Popular News (Last 30 Days)

LPG man bithliah thar