Lenkawl

Mizoram Legislative Assembly Inthlanpui neih tura Inthlan ni-a Duty tur hrang hrangte chuan nimin khan Training hmasa ber an nei.

Mizoram Legislative Assembly Inthlanpui neih turah nimin khan Serchhip District-ah Nomination Paper thehlut an awm belh lova, nimin tlai thleng khan Serchhip District-a Nomination Paper thehlut chu mi pakhat chauh ala ni. Nimin a LENKAWL in Candidate leh an Agent thenkhat te a biakna atanga a lan danin Vawiin hian inthlan chuh tum tam zawkte chuan Nomination paper thehluh an tum thu an sawi a, a bik takin Tuikum Bial-a inthlan chuh tur Political Party aiawhte leh Independent-a chuh tum te chuan Vawiin hian Nomination Paper thehluh an tum thu an sawi a ni.

Tuikum Block MNF buatsaihin nimin khan Chhiahtlang Bazar-ah MLA Inthlanpui neih tur atana Campaign Kickoff leh Tuikum Block MNF Conference neih a ni a, he hun hi Tuikum bial-a MNF Candidate Er. Lalrinawma chuan a hmanpui a ni.

Serchhip District chhunga Elementary School-a Zirtirtute tana buatsaih 'Innovation in Teaching Competition 2023' lawmman semna chu nimin khan Serchhip DIET-ah ah neih a ni. Serchhip DIET in 'Innovation in Teaching Competition 2023' an buatsaih ah hian Serchhip District chhunga Elementary School-a Zirtirtu a duh apiang ten an Video siam thehlut theiin mi 25 ten an thehlut a, heng atang hian a titha zual te thlanchhuah niin Zoremmawia (Vanchengte M/S) chu pakhatna niin H. Lalringhluna (PES Keitum) chu pahnihna leh R. Vanlalthawhpuia (Govt. Piler M/S) chu pathumna an ni a, Lalparmawia Chawngthu (Govt. New Serchhip M/S), Lalmuansanga (Govt. M/S-I Chhingchhip), C. Lianthangpuia (Chawngbuangi Memorial School Serchhip) leh JR. Vanlalrinchhana (Govt. Sialsir M/S) te chu Consolation Prize dawng tura thlan an ni.

Serchhip Bukpui leh Zuangtui inkar 132KV line Jungle Clearance hna chu tunkar Thawhtanni atanga Vawiin thleng hian thawh a ni dawn a, nimin leh niminpiah khan hmundang atanga Power lak niin Vawiin hian Bukpui Sub-Station ah Maintenance work hna thawh tum a nih avangin Vawiin (Oct. 18, 2023) zing dar 9:00 atanga tlai dar 4:00-ah he Sub-Station in a chawm ten Power an hmu thei dawn lo a ni.

Thla thar November 7-a Mizoram Legislative Assembly Inthlanpui neih turah Aizawl South-III a MNF Ticket-a ding turin F. Lal-nunmawia leh Thorang Bial-a INC Ticket-a ding turin Zodintluanga Ralte te chuan nimin khan Nomination an File ve leh ta a. Heti hian nimin thleng khan Seat 40 chuh turin mi 4 chiahin hming an la pelut a, tunkar Zirtawpni thlengin hming hi pekluh theih a ni ang.

India rama Court rorelna sang ber Supreme Court chuan Dan anga neih inang te inneih theihna tura Special Marriage Act siam danglam tumna chu nimin khan hnawlin he dan Section 40-na a neih inangte inneih theihna phalsak tumna chu a hnawl tel nghal a. Chief Justice of India DY. Chandrachud kaihhruai, Judge panga thukhawm chuan, Sawrkar laipui ngaihdan tarlangin, neih inangte inneih phalna dan siam danglam a nih chuan dan dang pawh siam danglam a ngaih phah dawn thu an sawi a, lungrual takin he dan siamthat tumna chu an hnawl tih an tarlang a ni.

ZOHANDCO leh Development Commissioner (Handlooms), Ministry of Textiles, Govt. of India tangkawp buatsaih Mizoram chhunga puantah leh Mizo puan atanga thuam hrang hrang phochhuahna hun ‘State Handloom Expo’ chu nimin khan Lawngtlai-ah neih tan a ni a, tun thla ni 29 thlenga neih tur he Expo-ah hian dawr 34 hawn a nih bakah La hlum leh puantah dan entirna, Theme Pavillion a awm bawk a ni.

Doordarshan (DD) Aizawl-a News Head Nampibou Marinmai chuan nimin khan Mamit tlawhin District Bawrhsap VL. Remliana nen an inkawm bakah Mamit District chhunga Polling Station zinga Lawng hmanga kal ngai, Dilzawl an tlawh dun a. DD News hotu Nampibhou Marinmai chuan Indian Information Service (IIS) hnathawh hrang hrang leh Mizoram-a Central Media, DDK leh AIR bakah Field Publicity te hmalakna hrang hrang a sawifiah a, Press Information Bureau (PIB) kaltlanga State sawrkar chetvelna hrang hrang puanzar a nih dan tlangpui sawiin, sawrkar laipui hmalakna hrang hrang nasa zawka Media kaltlanga puanzar a nih theihna tur a thawhpuiah Mamit bawrhsap leh a thawhpuite a sawm bawk a. Mamit DC pawhin a theih ang leh a tul anga thawhpui zel an tum thu a sawi bawk a ni.

Indian National Congress (INC) hruaitu Rahul Gandhi chuan Mizoram inthlanpui lo awm turah an Party an chak ngei a beisei thu a sawi.