Serchhip District chhunga Assembly Bial 3-ah MNF Ticket-a ding tur ten Nomination an file

Mizoram Legislative Assembly Inthlanpui neih tura chuh turin nimin khan Serchhip District-a Assembly Bial pathum (3)-ah mi pakhat theuh ten Nomination Paper an thehlut leh a, heti hian Serchhip District-a Bial pathum-ah mi pali (4) in Nomination Paper an thehlut ta a ni.
Nimin a Serchhip District chhung Assembly Bial pathum-a Nomination Paper thehlut te hi MNF Party atanga Bial hrang hranga chuh tur mi pakhat theuh an ni a, 26-Serchhip (ST) AC-a ding tur J. Malsawmzuala Vanchhawng chuan nimin khan he Bial-a Returning Officer David Lalthantluanga IAS hnenah Nomination File in hemi hnua thuthar thehdarhtu ten an kawmna ah Serchhip Bial tan hmathlir thui tak neiin mahni tawkah Pathian rinchhanin an penchhuak tih sawiin, “Pathian leh mipui zarah hlawhtlinna pawh kan chan ngei kan ring,” a ti a. An hmathlir leh an thiltum te chu mipuite hnenah puangin ziaka an la sem tur thu sawiin, “Tun tum Inthlan ah hi chuan Serchhip Bial mipuite hian Bial chhung mi kan lo nih ve na zawnah pawh min duhsaka Pathian leh mipui zarah hnehna sang ber kan chan ngei kan in beisei a ni,” a ti bawk. J. Malsawmzuala Vanchhawng hi Serchhip Bial-a Nomination Paper thehlut hmasa ber a ni.


27-Tuikum (ST) AC Bial-a MNF Ticket-a ding tur Bialtu MLA nilai Er. Lalrinawma pawhin nimin khan he Bial-a Returning Officer leh DRDO Project Director HD. Lalpekmawia hnenah Nomination a File a, Nomination Paper a thehluh hnua thuthar thehdarhtu ten an kawmna ah Pathian leh an Party hotute duhsakna zarah Tuikum Bial-a a ding leh thei tur chu lawmawm a tih thu Er. Lalrinawma chuan a sawi a. An Bial mipuite duhsakna leh khawngaihna dilin, hun rei tak an lo thawhho tawhna ah Vawiin thlenga mipui, Party, VC leh NGO te nen thawhhona tha tak an nei nia a hriat thu sawiin, lawmthu a sawi a. Hun thar lo thleng leh turah pawh an mi duhsakna leh khawngaihna a dil nghal bawk a ni. Tuikum Bial-a Candidate tura puan tawh zingah Er. Lalrinawma hi Nomination Paper thehlut hmasa ber a ni bawk.

Nimin vek khan 28-Hrangturzo Bial-a MNF Ticket-a ding turin Lalremruata Chhangte pawhin he Bial-a Returning Officer leh Serchhip Addl. DC Lalnundika hnena Nomination a File bawk a. Nomination Paper a thehluh hnua thuthar thehdarhtu ten an kawmna ah Lalremruata Chhangte chuan Party hruaitute duhsakna changa Hrangturzo bial-a ding ve a nih thu leh Hrangturzo chu a bial, Bial chhunga vote nei a nih thu a sawi a, Bial chhung harsatna hrang hrang leh Bial hmasawnna ngaihtuah turin hruaitute duhsakna a chan thu leh bial mipuite pawhin an thlawp tha nia a hrait thu a sawi a, Pathian leh mipui zarah hnehna an chan ngei a rin thu a sawi bawk. Hrangturzo Bial-ah hian Independent-a ding turin Rev. Dr. Zaichhawna Hlawndo chuan hemi hmalam hian Nomination Paper a lo thehlut tawh a ni.

Comments

Popular News (Last 30 Days)

Vawiin-ah HSSLC Exam result