ZPM in Serchhip-ah Tawngtai Retreat an nei
Serchhip Sub-Hqrs. YMA Conference Hall-a he hun hman ah hian ZPM Leader Lalduhoma chuan Kohhran in Corruption an vei ta hle tih sawiin, “Synod pawhin, ‘Corruption laka fihlim lo te chungah thuneihna nei lo mah ila, heng laka fihlim lo te chu rawng-bawlna langsarah dah loh nise, Dan in thiam loh a chantirte chu Kohhran in thunun ni rawh se’ tiin a rel ta hial,” tiin eirukna laka kan lo fihlim theih nana Kohhran te hmalakna chu a lawmawm hle tih a sawi a. Kan ram hruaitu ten Central-ah sum zuk sawichhuak thin mah se an mahni bawkin an eiru leh thin nia sawiin, “An hnuaia thawk Party Worker thenkhat ten an pu te eiruk an la sawi mam sak leh zel te hi thil mak a ni,” a ti.
ZPM Leader chuan ZPM Candidate te chu ‘ka eiru lovang’ tiin an tlangau mek tih pawh sawiin, “Mipuite pawhin ZPM chungah rinna an nghat mek a, he an rinna nghah hi kan lo sawrkar a nih chuan kan tithlawn dawn lova, kan eiru dawn lo a ni,” a ti a. “ZPM chuan chhung lam leh pawn lamah beihna tam tak tawk thin mah se, Vawiin thlengin Pathian in min la hruai zel a, tawngtai pawl ten tawngtaina nen nasa taka tan an lakna te hi Pathian hian a hria a, an tawngtai chhanna Vawiin thleng hian kan la hmu zel a ni,” a ti bawk.
ZPM Tawngtai Committee Chairman Rev. Darchungnunga kaihhruai he hunah hian ZPM Vice President Rev. Dr. K. Thanzauva pawhin Serchhip chu ram laili, Chief Minister bial ni rei ber a nih thu sawiin, “Mipuite rilru a nghet em em a, Pu Lalduhoma pawh hi in phatsan mai mai ka ring lo,” tiin ZPM Leader Lalduhoma chu Mizoram hruaitu atan hriak a thih a, hnung tawlh lova hmalam pan zel turin Mizo danin tawlhloh puan a bahtir hnuah a Lu chungah kut nghatin a tawngtai sak a, tawngtai hona neih a ni bawk.
Comments
Post a Comment