Zawlnei der thupuan hnawl nachang hre turin chah

Mizoram Kohhran Hruaitute Committee (MKHC) chuan Mizoram in Inthlanpui a hmachhawn mekah Zawlnei der leh Zawl thupuan hnawl nachang hre turin mipuite an chah.

Inthlan thuchah an tihchhuah ah MHKC chuan ram hruaitu tha Mizoram in a neih theih nan Political Party te chu Candidate atan Pathian tih mi, mi hmingtha leh rinawm, ruihtheih thila fihlim, hlepna bawlhhlawh leh thamna duh lo, mipat hmeichhiatna kawnga hming hliauna nei lo leh an awmna Kohhran, Sakhua leh pawla mi rinawm te thlang turin an ngen a. Mizoram chu Kristian ram a nih angin mipuiten Zawlnei der leh Zawlthupuan hnawl nachang hre tur leh Political party te pawh chutiang thupuan ang chi reng reng hmanrua atan hmang lo tura an duh thu an sawi a. Inthlanna thianghlim leh zalen taka mitinin mahni duh zawng an thlan theih nan Political party te chu hel pawl rawih emaw, invau leh ralthuam lam chi emaw hmang lo tur leh Candidate te chu vote leina anga ngaih theih sum leh thildang sem emaw pek emaw ti lo tur bakah inpumkhatna tichhe thei zawnga hma la lo turte pawhin an ngen a, tharum thawhna chawktho thei zawnga tawngkam uchuak tak hmang lo turin an chah bawk.