Rahul Gandhi-a’n an Party an chak a beisei tih a sawi

Indian National Congress (INC) hruaitu Rahul Gandhi chuan Mizoram inthlanpui lo awm turah an Party an chak ngei a beisei thu a sawi.

Nimin a Aijal Club-a chanchinbumite a kawmnaah Rahul Gandhi hian chanchinbumite zawhna chhangin an party in Mizoram-ah hmasawnna hmanraw pawimawh tak ni turin ‘tang puihna’ an kalpui dawn thu a sawi a. Mizoram hmasawn nan hmachhawp hrang hrang an neih thu sawiin, Mizoram-a sawrkarna an chan chu Mizoram hmasawnna mai piah lamah Mizo hnam leh nihphung vawnhim a nih zel theih nan thil pawimawh tak a nih thu a sawi a ni.

Rahul Gandhi chuan sawrkar laipuia sawrkarna an chan chuan India ram State hrang hranga sawrkarna an chan meknaa thil tha tam tak chu rampum huapa tihhlawhtlin a nih ve dawn thu a sawi a. An party leh party dang hrang hrang tanrualna INDIA chuan India ram nihna dik tak, mipuite zalenna leh dikna chanvo humhimna chak taka an vawn nun dawn thu leh, India ramin Constitution fel tak a neih hmanga dik taka ram an kaihhruai dawn thu a sawi a, State hrang hrang infinkhawm ram a nih angin India ramah hnam hrang hrangte nihphung vawnhim chu an sawrkar huna an ngaihpawimawh ber a nih dawn thu a sawi bawk a ni.

He hunah hian MPCC President Lalsawta pawhin an sawrkar chuan kum upa te tan Old Age Pension thla tin Rs. 2000 an pek dawn thu leh AAY leh PHH Card Holder te tan gas cylinder bur khat Rs. 750-a lei theih tura an subsidise dawn thu a sawi a. Tang puihna an kalpui tur chu Mizo mipuite tana hmasawnna tur pawimawh tak a nih dawn thu a sawi bawk a ni.

Rahul Gandhi hian thuthar thehdarhtute a kawm zawh hnu hian Lunglei a pan leh nghal a, mipui hmaa thu a sawi hnuah Agartala panin Mizoram a chhuahsan zui a ni.