MNF in Chhiahtlang-ah Campaign hawnna nei

Tuikum Block MNF buatsaihin nimin khan Chhiahtlang Bazar-ah MLA Inthlanpui neih tur atana Campaign Kickoff leh Tuikum Block MNF Conference neih a ni a, he hun hi Tuikum bial-a MNF Candidate Er. Lalrinawma chuan a hmanpui a ni.
Nimin-a he hun hmanna ah hian Er. Lalrinawma chuan Pathian leh mipui zarah Tuikum bialtu MLA term hnihna a hmang zo ta tih sawiin, “Hun kaltaah mipuite beisei a phak lohna kawng a awm anga, a thiamna pawhin a tlin loh chin te pawh a awm ngeiin a ring,” tiin Bial mipuite duh leh beisei anga thil tihfel loh a nei a nih chuan hrethiam tura ngenin thupha a chawi a. Bial chhunga eptute leh mipui, pawl hrang hrangte nen tualthu chhia nei lova term a hmang zo thei chu lawmawm a tih thu sawiin, Eptu ten amah PR siam hnan an nei miah lo bawk nia a hriat thu leh lawmawm a tih thu a sawi bawk.

Hei bakah hian Er. Lalrinawma chuan, “Inlungrualna leh inremna atangin hmasawnna dik a awm a ni,” tiin Hmasawnna nei ringawta lungrualna leh inremna neih loh a hlauhawm thu a sawi a. “Ka bial chhungah VC hrang hrang, MNF ni kher lo pawh an awm. Chung te lakah chuan thleibikna emaw, duhsak lohna ka lantir ve ngai lo. Inlungrualna nei ila hmasawnna dik a awm ang ka ti tlat a ni,” a ti a. “He bial tan hmachhawp tur tam tak kan nei, sikul tam tak dinhmun tha zawkah hlankai an ni. An nihna dinhmun ang taka hna thawk tur chuan MNF sawrkar a ngai,” a ti bawk.

Tuikum bial MNF Campaign Kickoff leh Block MNF Conference hi an President T. Sangzuala chuan kaihruaiin Martar te sunna hun hman a nih bakah MNF General Hqrs. atangin R. Lalhnuna, PAC Member leh Ramzauva, Adviser te pawhin thu an sawi bawk a ni.