Lenkawl

Nimin khan Serchhip District-ah COVID-19 hri kai mi 5 lai hmuh belh leh niin Serchhip District-ah COVID-19 hri kai enkawllai mi 19 zet an awm leh ta a. Tunhnaia COVID-19 hri kai hmuhchhuah tamna Thenzawl-a PTS atangin nimin khan hri kai mi pakhat hmuh belh leh niin East Lungdar khua atangin hri kai mi 4 hmuh belh an ni bawk a. East Lungdar atanga hri kai hmuhchhuah te hi hri kaina hriat loh leh zinchhuahna nei lo an ni. Heti hian Serchhip District-ah hri kai enkawllai mi 19 awmin an zinga 14 te chu PTS-a awm te an ni.

MNF General Hqrs. Media and Publicity Department chuan tunhnai khan Thenzawl tlawhin, ZPM Leader Lalduhoma’n a bial, amah duh taka thlang tlingtute dawta nasa taka a bum duh chu mak an tih thu leh pawi an tih thu sawiin, “Awihawm taka dawt a sawi thin hi sim tawh turin thurawn kan pe a ni,” an ti.

Serchhip leh Thenzawl inkar Mat lui-a Lei hlui (Bailey Bridge) chu PWD ten an thiat dawn ta a, he Lei thiahna turah hian Thenzawl ram lam-a kawngpui atanga lui panna, VL. Lalhmangaiha Quarry panna kawng chu bungrua te hnuhchhuahna atan hman a ni dawn a, hei vang hian Serchhip SP Vanlalnghenga chuan helai kawng, kawngpui atanga Mt lui panna hi tun thla ni 12 zing dar 9:00 atangin khar a ni dawn tih a puang a. He kawng khar hma zawng hi Quarry neitute inbuatsaihna hun atan pek niin he thupek chungchanga harsatna nei te chuan Serchhip leh Thenzawl Police Station bakah Serchhip Police i/c Traffic te biak theih a ni ang.

Serchhip khawpui chhunga lirthei kal dan leh lirthei dahna hmun chungchanga harsatna te chu nimin khan Serchhip Addl. SP Saidingliana Sailo hovin Serchhip Sub-Hqrs. YMA leh VC ten a hmunah an enfiah.

Mizoram-a DIET hnathawkte harsatna chu sawrkarin ni 15 chhunga chinfel a tiam avangin hnathawh tan leh an remti.

Kum 2015 September thlaa naupang kum tlinglo pawngsualtu a puh John Lalhruaizela s/o Lalhmangaiha @ Kanchha, Vaitin khua chu P. Singthanga, Presiding Officer, (E) Fast Track Special Court (POCSO Act), Aizawl Judicial District, Aizawl chuan thiamloh chantirin kum 10 lung In tang tur leh Rs. 3000 chawi turin a chungthu a rel sak a, a pawisa chawi tur hi a pe theilo anih chuan hrehawm takin thla 3 dang a tan belh dawn bawk a ni.

Mizoram Pradesh Congress Committee (MPCC) chuan nimin khan Lal Thanhawla Auditorium, Aizawl-ah Executive Meeting neiin April 21, 2023 a MPCC Treasurer Zodintluanga Ralte-in banna a thehluh chu an ngaihtuah hnuah May 1, 2023-a MPCC President nena Press Conference an lo neih tawh angin lung-rual takin a pawm a. Treasurer thar ruat chung-changa thuneihna chu Elected OB-te kutah a an hlan bawk.

Mizoram Upa Pawl (MUP) General Assembly vawi 48-na neih a kum 2023-2025 chhunga hruaitu tura an thlan te chuan nimin khan mawh-phurhna an la tan ta a. MUP General Hqrs. ah hian Nghaklianmawia (MCS Rtd) chu President niin Vice President-ah Lalbiakmawia Khiangte, (Excise Commissioner Rtd), General Secretary-ah K. Thanmawia, Asst. General Secretary-ah J. Thanglura, Treasurer-ah Vanlalthanga leh Fin. Secretary-ah Rev. K. Darsailova te thlan an ni.

Nimin khan Champhai-ah District Tuberculosis (TB) Forum chu an Chairman leh Champhai DC James Lalrinchhana hovin an thukhawm a, he huna tarlan a nih danin Undivided Cham-phai District-ah TB vei enkawlna pek mek mi 78 awmin an zinga 8 te chu Multi Drugs Resistance TB (MDR-TB) an ni. Kumin ah April thla tawp thlengin TB vei hmuhchhuah 42 awmin Champhai District-ah TB veite ei leh in-a tanpuina pe tura inpe TB Mitra an tlem thu leh hemi kawnga penchhuak tura mipuite zirtirna pek tam a tul thu tarlan a ni.

Cheng nuai 241.84 senga Hnahthial PWD Complex-a DC Circuit House sakna tur lung-phum chu nimin khan bialtu MLA leh Health Minister Dr. R. Lalthangliana chuan a phum a, Health Minister Dr. R. Lalthangliana chuan District thar pathum-ah District Hospital sak thuai a nih tur thu sawiin, Hnahthial-a CMO Office sak mek pawh zawhfel tep a nih thu leh kawng hrang hrangin Hnahthial Damdawi In chu tih changtlun mek a nih thu a sawi a, Blood Bank pawh hman theihin kalpui thuai a beisei thu a sawi bawk. Hnahthial DC Circuit House hi SASCI sum hmanga sak tur niin chhawng hnih a sak tur a ni a, September ni 30, 2024-ah ah sak zawh hman tura ruahman a ni.