ZPM Leader Lalduhoma’n a bial mipuite dawta nasa taka a bum duh hi mak kan ti - MNF
MNF General Hqrs. a General Secretary VL. Krosshnehzova chuan nimin khan Aizawl Press Club-ah thuthar thehdarhtute kawmin MNF General Hqrs. Media and Publicity Department-te chu April 28, 2023 khan Thenzawl-ah kalin ZPM Leader, an bialtu MLA Lalduhoma hmalakna hrang hrangte zirchiangin, Inthlan hmaa mipui hmaa a thutiamte a tihlawhtling em tih te an enfiah bawk tih an sawi a. November ni 27, 2020 khan Lalduhoma hi Serchhip MLA a nihna atangin ban a nih thu leh thlan tlin a nih atangin kum 2 dawn a MLA hman bakah April ni 17, 2021 khan bye-election-ah vote thlak niin MLA-ah thlantlin a ni leh tih an sawi a. Serchhip MLA ni leh tura bye-election campaign lai hian Lalduhoma hian Thenzawl mipui tan kawng hrang hrangin hmalakna tura intiamna a nei nia sawiin, “MLA a lo nih leh takah hian a intiamna te hi tihhlawhtlin a nei mumal lo a, tihlawhtling tura hmalakna pawh a nei lo a, a ngawihsan hmiah ringawt mai a ni,” an ti.
April ni 10, 2021 khan MPF Joint Local Forum, Thenzawl buatsaihin bye-Election Joint Platform buatsaih a nih thu pawh VL. Kross-hnehzova chuan sawiin, hemi tum hian Lalduhoma hian Thenzawl leh a chhevel tana a hmalakna turte a puang tih a sawi a. “Private Company nen, Government Organisation ka dawr fel tawh a, Agreement kan sign nghal mai dawn a ni. Handloom chuangchangah hian MLA ka tlin leh phawt chuan reilote chhungin, he kalphung thar hi ka siam sak thei che u a ni, tih hi ka puang duh a ni,” tiin a sawi nia sawiin, he intiamna hi an zirchian thu leh Handloom chungchangah an bialtu MLA hian eng hmalakna mah a neih an hriat loh thu an sawi tih an sawi a ni.
Hei bakah hian, “Thenzawl hian College a mamawh ve tawh a ni. Tunah hian min hmui turte pawh kan be fel tawh a, kan sawiho nual tawh a, tun atanga reilote ah hian College nei turin hma kan la chho tawh dawn a ni,” tia a sawi pawh, “Thenzawl-in College a neih theihna tura hmala tura intiam siin an MLA hian hma a la leh si lo a ni,” an ti a. “Vanva Dam khi kan enkawl tha dawn a, a hmunah ka han en tawh a, a thing thuap mai a, khi khi kan khuah belh anga, a ko khi tlemin kan tisang ang a, Thenzawl Water Supply Scheme a nih bakah a thlang lawkah khian Maudarh zau a awm a, Maudarh ram khian an huana tui lak nan an hmang thei dawn a ni,” tia a sawi pawh hmalakna pakhatmah a nei lo niin an sawi.
“Ultrasound hi sawrkarin min tihsak thei dawn lo a nih chuan MLA Fund atangin kan ti nghal ang,” tia Lalduhoma’n a sawi chu tun thlengin a la dah lo niin VL. Krosshnehzova chuan a sawi a. Heng bakah hian Lau lui Project chungchanga hmalaknaa a tumna leh Thenzawl mipui nuai 10 awm theihna khawpuia siam tura hmalak chungchang ah pawh hmalakna a awm hriat a nih loh thu an sawi a ni.
Thenzawl bik an zirchianna ah hian Lal-duhoma hian a bial mipuite dawt a hrilh nasa hle tih chu an hmuhchhuah a nih thu MNF General Secretary chuan sawiin, “ZPM Leader Pu Lalduhoma’n a bial, amah duh taka thlangtlingtu te dawt-a nasa taka a bum duh hi MNF chuan mak kan tiin pawi kan ti hle a. Chhuanlam siama phat mawina zawng lovin a bial hi a ngaihsak lova, dawtin nasa takin a bum tih pawm sela, awihawm taka dawt a sawi thin hi sim tawh turin thurawn kan pe a ni,” an ti bawk.
Comments
Post a Comment