Lenkawl

Nimin Nov. 14, 2022 tlai dar 3:30 vel khan Hnahthial leh Dawn inkar kawng laitu ABCI te lung lakna Maudarh hmun ami chu a chim a, mi 15 vel a chhilh bakah lai laihna khawl leh kawl dang engemaw zat a chhilh nia hriat a ni.

Chawlhkar hnih chhung awh tur Serchhip District tana Up-Scaling of Aapda Mitra Scheme Training Batch 2-na chu nimin khan Serchhip-ah neih tan niin khaw hrang hrang atanga Training mi 50 te chu chhiatna lo thlen thulha chhanchhuah leh chhawmdawl dan hrang hrang zirtir an ni dawn a ni.

Chhiahtlang South Village Council Executive Body thar thlanna chu nimin khan neih a ni.

MFA Inter-District Senior Women Football Championship khel tur Serchhip District Team te chuan nimin khan Serchhip chhuahsanin Siaha an pan.

Nimin khan Serchhip-ah Children’s Day, 2022 chu District Bawrhsap hovin hman a ni.

Serchhip East Block MNF hruaitu turte ruat thar an nih hnuah nimin khan hruaitu hlui leh thar te chuan Serchhip Venglai-a Mizo Hnam Run-ah mawhphurhna an inhlan ta a, an hruaitu thar te hian Secretary turte pawh ruat nghalin Secretary-ah Abraham Chhangte (New Serchhip) leh C. Lalrinfela (P&E Veng) te an ruat bakah Fin. Secretary-ah C. Lalrotluanga  (New Serchhip) te an ruat nghal bawk.

Nimin khan Mizoram-ah COVID-19 hri kai chhinchhiah thar mi pakhat awmin hei hi Sample enfiah 31 atanga chhut chuan za zela 3.22 in hri kai ang an ni a, nimin khan hri kai mi 6 te chu anmahni enkawlna hmun atanga chhuahtir an ni thung. Heti hian nimin tlai thleng khan Mizoram-ah COVID-19 hri kai enkawllai mi 34 an la awm a, hri kai zingah mi 726 an boral tawh bawk a ni.

Lunglei District huamchhunga College zirlaite tana thiam thil hrang hrang online e-learning platform, IBM SkillsBuild kaltlanga zirna chu kalpui tan a ni. District Skill Committee, Lunglei District hmalakna a IBM SkillsBuild kalpui hmang hian Lunglei District chhunga zirlai 3000 chuang ten thiam thil an zir dawn a, zirna In hrang hrangah Orientation Session neih chhoh mek a ni.

Nimin khan Mamit-ah District Bawrhsap Lalnunhlua hovin September 2022 Quarter chhunga Mamit District chhunga Bank hrang hrangte hnathawh dan thlirhoin thutkhawm neih a ni a, he hunah hian Social Security Schemes hrang hranga hmalakna te tarlan niin pawisa dah hmasak ngai lova Bank Account hawnna Pradhan Mantri Jan Dhan Yojana (PMJDY)-ah Bank Account 29,984 awm mekin Pradhan Mantri Jeevan Jyoti Bima Yojana (PMJJBY) hnuaiah inziaklut mi 16,983 an awm a, Pradhan Mantri Suraksha Bima Yojana (PMSBY) hnuaiah mi 33,638 an inziaklut bawk a ni. He hunah hian Credit Deposit Ratio (CD Ratio) chu 74.56% a nih thu tarlan a ni bawk.

ICAR Research Complex for NEH Region Mizoram Centre in ni 2 chhung awh tur Kolasib-a Kisan Mela an buatsaih chu nimin khan Chief Minister Zoramthanga chuan a hawng a, Chief Minister chuan lei nghenga eizawnna hmanga Mizoram chu intodelh turin ram mipui chawm zo khawp ram ruak hman tangkai theih a awm thu te, sik leh sa nuam, ruahtui tha tak, boruak thianghlim te a awm thu a sawi bawk. Kisan Mela-ah hian Stall 21 awmin, sawrkar department bakah Thingdawl Farmers Society, Kawnpui Women Farmer club, Bilkhawthlir SHG, MzSRLM Thingdawl RD SHG ten an thil siam leh tharchhuah an phochhuak a ni.