Serchhip District-ah chhanchhuah leh chhawmdawl hna thawh dan inzirtirna neih chhunzawm a ni

Chawlhkar hnih chhung awh tur Serchhip District tana Up-Scaling of Aapda Mitra Scheme Training Batch 2-na chu nimin khan Serchhip-ah neih tan niin khaw hrang hrang atanga Training mi 50 te chu chhiatna lo thlen thulha chhanchhuah leh chhawmdawl dan hrang hrang zirtir an ni dawn a ni.

Mizoram sawrkar-a Disaster Management & Rehabilitation (DM&R) Department leh District Disaster Management Authority (DDMA) Serchhip tangkawp buatsaih he training hawnna inkhawm Serchhip DIET Conference Hall-a neih ah District Bawrhsap leh DDMA Chairman ni bawk Nazuk Kumar chuan hetiang Training pawimawh tak Serchhip-a buatsaih a ni chu lawmawm a tih thu sawiin, ram changkang zawk leh hmasawn tawh ah chuan lirnghing leh chhiatna liantham a thlenin nunna chan leh thil hlu hloh nasa lutuk lo-a an paltlang thin thu sawiin, hei hi inbuatsaihna leh inpuahchahna nasa zawk nen heng chhiatna te an lo hmachhawn thin vang a nih thu a sawi a. Hetiang hi kan neih ve theihna turin India sawrkar pawhin ruahmanna siamin, hetiang training hi buatsaih chhoh mek a nih thu a sawi a. Chhiatna lo thleng reng reng ah khawtlang mipuite chu a hmuna awmsa, chhanchhuah leh chhawmdawl hna thawk tura hla taka kal ngai lo an nih avangin an pawimawh thu sawiin, khawtlang mipuite hian hetiang hun a lo thlen ah hian tih theih kan nei ve a ni tih kan hriat a pawimawh thu leh chutiang hun a lo thlena mipuite kaihruaitu leh kawhhmuhtu ni tura he training hi buatsaih a nih thu a sawi a. “Vawiina lo kalkhawm Serchhip District thalai mahnia inpe (Volunteer) te hi Serchhip District in chhiatrupna a tawh palh nia mipuite chhanchhuaktu tur in ni ta a. In pawimawhzia leh in thil zir tur tangkaizia hre renga theihtawp chhuaha lo inzir ngei turin ka ngen che u a ni,” a ti a. Training a tel tura thlanchhuah zingah Hmeichhia te pawh an awm nual chu lawmawm a tih thu pawh Bawrhsap chuan sawiin, chhiatna thleng leh thleng palh thei ah mithiam zawk leh thuneitute hnena hriattir hma chu vanduaina nasa zawk pumpelhna atan a tangkai thei tih sawiin, hemi kawngah hian training chhuak te hman tangkai an nih tur thu a sawi bawk.


Nimin-a he training hawnna inkhawm hi Aapda Mitra-a State Training Coordinator leh DM&R Department-a Deputy Director (Trg) Dr. Lalrokima Chenkual chuan kaihruaiin DM&R Director Benjamin Lalzama chuan he training a tel te hi Certificate leh an hnathawhna tur bungrua pek an ni dawn tih sawiin, an thil dawn te chu mamawhna apianga hman theih tura tuaihniam reng turin a chah a, chhiatna a lo thlen palh a mipuite chhanchhuah hna thawktu tura inpe an nih inhre reng turin a chah bawk.

He hunah hian Lalrinawma Traite, Jt. Director, Operation, DM&R chuan Aapda Mitra hi Mizoram-ah chuan Aizawl District-a Pilot Project kalpui a nih hnuah Serchhip, Lunglei, Mamit, Kolasib leh Champhai District-ah te kalpui a nih dawn thu a sawi a, Serchhip District-a mi 50 te Sept. 15-24, 2022 chhung khan State Training Centre-ah training pek an nih tawh thu leh tun tumah hian khaw 21 atangin mi 50 te training pek leh tur an nih thu sawiin, training neih chhung hian chhanchhuah leh chhawm-dawl hna thawh dan te, First Aid pek dan te, ram leh In kang a awm changa chet lak dan tur te, Tui tla zawn dan te leh chhiatna dang thlen thulha hmalak dan te zirtir an nih dawn thu a sawi bawk a ni.

He training hi tun thla ni 25 thleng khian Serchhip Chanmari Veng-a Nursing School Building-ah neih tura ruahman a ni a, Training a tel te nakin zelah pawh khawtlang in an chhawr tangkai zui theih nan ruahmanna siam zui zel tum a ni bawk.

Comments

Popular News (Last 30 Days)

LPG man bithliah thar