Latest News

VC Executive Body siam fel

Chhiahtlang South Village Council Executive Body thar thlanna chu nimin khan neih a ni.
Chhiahtlang South Village Council-a Treasurer H. Lalrawngbawla chuan kumin October 27 khan Serchhip DLAO hnenah an VC President a thlawpna a hnuhdawh thu a thlen a, hemi hnu Nov. 3, 2022 khan LAD-a thawktute kaihhruaina hnuaiah VC Executive Body thar hi din tura tih niin amaherawh chu rokhawlhna a awm avangin thulh a ni a. Hemi hnu Nov. 7 khan Serchhip DLAO chuan VC Executive Body thar siam tura Sitting nei tura thuchhuah siam lehin Sitting hi neih ni mah se member an kim loh avangin Executive Body hi siam theih a ni lo leh a, nimin chawhnu khan Sitting koh leh niin Serchhip DLAO F. Lalnisai hoin VC House-ah VC Body thar hi siam fel ani ta a ni.

Chhiahtlang South VC Executive Body siam thar ah hian H. Lalrinawma (INC) chu President a ni dawn a, C. Lalrinmawii (Ind) chu Vice President niin H. Lalrawngbawla (ZPM) chu Treasurer a ni dawn a, Member-ah R. Lalremchhunga (MNF) leh K. Lalbiakmawia (INC) te an awm dawn a. VC Executive Body thar hi pawmpui turin thawn nghal a ni anga, mawh-phurhna an inhlan hun tur erawh tihfel a la ni lo thung nia thudawn a ni.

Tarlan tawh angin Chhiahtlang South VC-ah hian Seat 5 awmin VC inthlan hnuhnung berah khan INC in Seat 2 lain MNF, ZPM leh Independent ten seat khat theuh an la a. MNF, INC leh Independent te hian a tirah Executive Body siam mah se Independent-a thlantlin hian Treasurer a nihna a bansan avangin kumin kumtir khan ZPM atanga thlantlin chu Treasurer-ah ruat a ni ve leh a, tunah hian a tum thumna atan Executive Body siam thar a ni leh ta a ni.

Comments

Popular News (Last 30 Days)