Lenkawl

Serchhip District Hospital-a COVID-19 Sample Test-na hmun, DCHC building hnuai chu COVID-19 hri leng mekah naupang hri kai te enkawlna tur hmun atan siam tum a nih avangin Sample test-na hi Serchhip Press Club bula Health Department building ruak ah sawn a ni a, COVID-19 Sample Test tur chuan helai hmun ah hian pan tawh tur a ni.

Tun thla ni 18 atanga neih tur 18th Inter District Boxing Championship-a Serchhip District aiawh turte chu thlanfel an nih hnuah nimin atang khan Serchhip Boxing Hall-ah Camp neihpui an ni a, he intihsiakna hmachhawn tura an kal hma zawng Camp hi neih a ni tawh ang. Tun tuma Inter District Boxing Championship hi Aizawl Ramhlun Boxing Hall-ah khelh tura ruahman niin Serchhip District aiawh tur hian Boxer 33 thlanchhuah an ni a, an zinga mi 24 te hi mipa niin hmeichhia 9 an tel bawk a, Serchhip bakah District chhung khaw hrang hrang atangin Boxer te hi thlanchhuah an ni.

Nizan thleng khan Serchhip District-ah COVID-19 hri kai enkawllai mi 135 awmin hri kai enkawllai hi an tlem ve hret hret zel a ni.

Chhiahtlang Hmar Veng Branch YMA ten an Volleyball Court laihchhiat tura zangna-dawmna an hmuh tur ang an hmuh loh avanga KRAM Infracon Pvt. Ltd. te hnathawk tur Pathianni atanga an dan chu nimin khan titawpin Vawiin atangin hna thawh tan a ni ang.

Zoram People Movement (ZPM) Serchhip Block chuan nimin khan New Serchhip YMA Hall-ah kum 2022-2024 chhunga hruaitu tur thlanna an nei a, President atan V. Rozamliana (P&E Veng), Vice President-ah  R. Zakapa (New Serchhip) leh Treasurer-ah Zothanpuia (Field Veng) te thlan an ni. He inthlanna ah hian mi 169 an kal a ni.

Serchhip Field Veng-a chhungkaw pakhat chuan damlohna avanga ei leh bar dap kawnga harsatna an neih avangin Serchhip Thalai Pawl te chuan nimin khan eizawnna bual an tan theihna turin Kuhva rah, a kawrpui khehna leh a thelna khawl an hlan.

Thenzawl Zone Football Association buatsaih '3rd RP Store Football Tournament' chu nimin khan Thenzawl Lothazawl Football Ground-ah khelh tan niin Serchhip District Information and Public Relations Officer K. Saitluanga MIS chuan he Tournament hi a hawng a ni.

Nimin khan Siaha-ah District Bawrhsap hovin Village Level Committee on Myanmar Refugee chu an thukhawm a, he hunah hian raltlan te khuahkhirhna hrang hrang point 12 duan niin Raltlan naupang te Zirna (Education) chung-chang te, Damlo thil a inenkawl dan tur te, Furpui lo thlen hma a Refugee Camp te thawm-that dan tur leh Mitthi vui leh inphumna chungchang te rel a ni. Siaha District-ah hian VC 54-ah raltlan mi 9827 an awm mek a ni.

Peoples' Conference Party Thalaite chuan Assam leh Mizoram ramri Link Road Vairengte leh a chhehvel laih nana thuneitu lamin cheng nuai 1900 hmanral tawh anga an tarlan laia cheng nuai 200 vel chauh senral a la ni si chuan cheng nuai 1700 chu tihchingpen a ni tih a tichiang ah an ngaih thu thuchhuah siama tarlangin, he thil hi hriatthiam harsa an tih thu leh a rang thei ang bera mawhphurtute chhui chhuak turin Mizoram sawrkar an phut thu an thuchhuah ah chuan an tarlang bawk.

Nimin zing khawvar hnu lawk khan thlipui na takin Mizoram hmun thenkhat nuaiin hmun tam takah chhiatna a thlen a, Vairengte Kawng-thar Veng-ah chenna In pakhat thli hian chhem tlu in In neitute an him hlauh a, Mamit khawpui chhung Veng hrang hrangah chenna In chhia 13 zet awmin mihring thi leh hliam an awm lo hlauh bawk. Mamit-a In chhia zinga 4 te chu luah zui tlakloh niin In chhia zingah hian DCHC-a hman mek pawh a tel a, DCHC hi hmundang ah sawn nghal turin ruahmanna siam a ni.