NH. 54-a company kawng lai tur dan titawp

Chhiahtlang Hmar Veng Branch YMA ten an Volleyball Court laihchhiat tura zangna-dawmna an hmuh tur ang an hmuh loh avanga KRAM Infracon Pvt. Ltd. te hnathawk tur Pathianni atanga an dan chu nimin khan titawpin Vawiin atangin hna thawh tan a ni ang.

Chhiahtlang Hmar Veng Branch YMA te hian NH. 54 laihzauh leh siamthat hna thawh mekah an Volleyball Court laihchhiat tur chu zangnadawmna an la hmuh loh avanga Pathianni atanga hnathawk tur an dan chungchang ah nimin khan Serchhip District thuneitute hovin Chhiahtlang-a VC pahnih leh Chhiahtlang Hmar Veng Branch YMA hruaitute hian inkawmna an nei a, Chhiahtlang North VC te hian helai hmun laihchhiat tur a nih avanga zangnadawmna pek tur sum Rs. 81,600/- chu Branch YMA te hnenah pek an remtih tak avangin Chhiahtlang Hmar Veng Branch YMA hian hnathawktute an dan chu an titawp zui nghal a, Vawiin hian kawng laih hna pawh hi chhunzawm nghal a ni ang.

Thudawn danin VC inthlanpui hnuhnung ber neih hma khan Chhiahtlang hi VC pakhat hnuaiah awmin NH. 54 laihzauh leh siamthatna tura zangnadawmna pekchhuah a nih khan VC te kutah he sum hi a lut a. VC inthlanna neih a nih hnuah VC pahnih te chuan he sum hi insem zuiin Chhiahtlang Hmar Veng Branch YMA te hian VC te hnen atang hian Volleyball Court laih chhiat a nih dawn avanga zangnadawmna an hmuh tur hi an hmu thei ta mai lova. Hei vang hian zangnadawmna an hmuh tur hi an hmu lo a nih chuan Volleyball Court hi laihchhiat rem an ti lova, hetianga nimin-a inremna an neih theih takah chuan hna pawh a pangngai a chhunzawm leh theih tawh beisei a ni.