Serchhip DIPRO in Thenzawl-ah kum bithliah Football inelna a hawng

Thenzawl Zone Football Association buatsaih '3rd RP Store Football Tournament' chu nimin khan Thenzawl Lothazawl Football Ground-ah khelh tan niin Serchhip District Information and Public Relations Officer K. Saitluanga MIS chuan he Tournament hi a hawng a ni.


Tun thla ni 23 thlenga khelh tur he Tournament hawnna ah hian Serchhip DIPRO chuan Thenzawl khua in Football tana thahnem ngai leh Tournament huaihawtna sum pe thei an nei chu lawmawm a tih thu sawiin, Thenzawl-a Football khel mi te pawh an vannei hle tih a sawi a. He Tournament hi Football khel thin ten tumruhna leh hmalam pan tura inchherchhuahna atan hmang se a duh thu sawiin, infiamna khawvel ah zuk leh hmuam leh ruihtheih thil ti thin dan hlawhtlin leh dinchhuah a har thu a sawi a, mahni inthunun thei leh taima taka bei hram hram thin te an dingchhuak thin tih hre reng turin a chah a. He huna kalkhawm infiammi leh anmahni tawiawmtute chu sawrkar ruahmanna leh hmalakna te mahni awmna hmun atanga sawisel mai lova zirchianga a nihna hriat tum thin tura chahin, ram in hma a sawnna turin mahni dikna leh chanvo te chauh hre lova mahni tihtur kan hriat ve a pawimawh thu a sawi bawk.

TZFA Asst. Secretary Henry Lalthanpuia kaihhruai he hunah hian Thenzawl Zone Football Association President Liantluanga Renthlei chuan hetianga Age Group Tournament an buatsaih leh thei chu lawmawm a tih thu sawiin, kum 2019-ah a vawikhatna atan Tournament hi huaihawtin hri leng avanga kum 2020-a neih theih a nih loh hnuah nikum lamah hri leng ziaawm laia a vawi hnihna an lo buatsaih tawh thu leh kumin ah an buatsaih leh thei chu lawmawm a tih thu a sawi a, tunah hian lawmman tha zawk awmna MLA Cup buatsaih leh an tum mek thu pawh a sawi a. Khawvela infiammi hlawhtling te chu an chhungte leh Association te thawhrimna avanga hlawhtling ni lovin, tih tak taka ti thin, tumruhna leh theihtawp chhuah thin te an hlawhtling thin tih hre reng turin he huna kalkhawm infiammi te chu a chah bawk.

Thenzawl Zone Football Association buatsaih Age Group Tournament-ah hian Category pathum ah inelna neih a ni dawn a, Under-10 ah Team 7 telin pakhatna in Rs. 5000/- leh pahnihna in Rs. 2500/- an dawng anga, Under-14 ah Team 8 telin pakhatna in Rs. 5000/- leh pahnihna in Rs. 3000/- an dawng ang. Under-17 ah Team 6 telin pakhatna in Rs. 7000/- leh pahnihna in Rs. 4000/- an dawng bawk anga, heng bakah hian Category tinah Top Scorer lawmman siam a nih dawn bakah mimal lawmman dangte siam a ni bawk ang.

Comments

Popular News (Last 30 Days)

LPG man bithliah thar