Lenkawl

New Serchhip South Village Council chuan New Serchhip-a Boxing Hall chu COVID-19 hri kai  enkawlna, 4C atan an hmang dawn a, Inrinni khan hnatlang in a hmunhma hi buatsaih a ni.

Nimin khan Serchhip District-a Khawlailung khua ah African Swine Fever (ASF) vangin Vawk thi pali a awm leh a, Khawlailung-ah hian ASF vang hian Vawk 21 lai a thi tawh a ni. Nimin a Vawk thi nen hian Serchhip District-a ASF vanga Vawk thi chu 3757 a tling ta a, nimin lamah Vawk suat awm belh lovin Serchhip District-a ASF hri lenna hmuna Vawk suat tawh chu 3028 a ni.

Serchhip District-a COVID-19 hri kai hmuh tawh chu nimin tlai thleng khan mi 2859 zet an tling tawh.

Chhimchhak Presbytery Inkhawmpui vawi 98-na chu nimin khan Bethel Kohhran, Serchhip P&E Veng-ah zawhfel a ni ta a, nimin khan Kohhran Upa atan mi 6 nemngheh niin Upa boral mi 6 sunna hun hman a ni bawk a, nakum-a Chhim-chhak Presbytery Inkhawmpui chu Chhiahtlang Kawn Veng Kohhran Biak In-ah neih a ni ang.

Chief Minister kawm

Mizoram-a COVID-19 hri kai hmuhchhuah chu la tlahniam thei tak tak lo mah se tunhnai ni 4 chhungah erawh hri kai hmuh hi an tlahniam hret hret a, Inrinni-a Sample enfiah 6188 atangin hri kai mi 1170 hmuh leh an ni a, Sample enfiah atanga za zela 18.91 te chuan hri an kai a ni.

Tun thla ni 30-a Tuirial bial MLA bye-election lo awm turah Tripura-a tlanchhia Tuikuk te tan Special Polling Station siam anih dawn leh dawn loh a la hriat loh a, Election Department chuan ECI thu an nghak mek.

Mizoram sawrkarin September 2021 thleng khan State pawn atanga kawlphetha leina man la pek loh cheng vbc. 47.21 zet a nei a. Hetihlai hian tun dinhmunah Small Hydel Project (SHP) leh Solar Plant hmun 10 a siam turin hmalakna kalpui mek a ni thung.

Mizoram-a COVID-19 hripui darh mek zirchiang tura sawrkar laipuiin a rawn tirh, Multi Disciplinary COVID-19 Study Team te chuan Inrinni khan Champhai tlawhin COVID-19 hrileng dinhmun an zirchiang.

Vawk natna hlauhawm tak African Swine Fever (ASF) vanga Mizoram vawk thi chu 29,000 dawn an tling tawh a, hetihlai hian Vawk hri leng chuan ziaawm lam a pan hret hret thung.

Mizoram-ah COVID-19 Vaccine la thei kum 18 chunglam awm zawng zawng atanga chhuta za zela 88.51 te chuan Vaccine Dose 1-na an la tawh a, tunah hian kum 18 chunglam leh hri danna la thei, pawn chhuak theilo te hri danna pe turin inbuatsaihna kalpui mek a ni.

Nimin khan Serchhip District-ah COVID-19 hri kai mi 69 hmuhchhuah belh leh niin mi 70 enkawl dam an ni thung.

Nimin khan Serchhip District-ah African Swine Fever (ASF) vangin Vawk thi 14 lai awm belh lehin ASF vanga Serchhip District-a Vawk thi pawh 3751 a tling tawh. Nimin a ASF vanga Vawk thi 14 zinga 7 te hi Thentlang khua ami niin Thentlang-ah hian ASF vangin Vawk 19 a thi ta a, Thentlang khua ah hian nimin vek khan Vawk 7 chu suat a ni leh bawk. Hei bakah hian Chhuanthar Tlangnuam-ah nimin khan Vawk 3 thi bawkin Chhingchhip leh Sailulak-ah Vawk pahnih ve ve a thi tawh bawk a ni.

Serchhip-a awm 8th Assam Rifles te chuan Serchhip-a Hnuchham chawmna pahnih Zoar Urban Deprived Children's Home leh Unity Orphanage Home te chu nimin khan tlawhin tanpuina an hlan a. Hri leng karah nu leh pa neilo hnuchham te hrehawm taka an awm biklohna turin hetiang hian hma an la tih Assam Rifles hotute chuan sawiin, naupang te rilru-ah inkiltawihna awm lova huaisen taka khawvel an hmachhawn theihna tura fuih thar chu an tum ber anih thu an sawi a ni. He hunah hian Ration bakah nitin khawsakna a an mamawh turte an hlan a ni.

Baptist Church of Mizoram (BCM) chuan Bial rorel Inkhawm nei mekin Vawiin hian zawhfel a ni ang.

Serchhip District chhunga Presbytery lian ber, Chhimchhak Presbytery Inkhawmpui vawi 98-na chu nimin atang khan Serchhip Bethel Kohhran-ah neih a ni a, naktuk Pathianni thleng a awh ang.

Serchhip District Bawrhsap Kumar Abhishek IAS chuan nimin, October 8, 2021 tlai khan Serchhip bul Mat lui kam, Zawlpui zau-a Buh chingtute an leilet-ah tlawhin hma an sawn zel theihna tura an mamawhte a sawipui.

Tun thla ni 2 atanga Serchhip-a Faina Hapta (Cleanliness Week)-2021 hman chu nimin khan Serchhip DC’s Conference Hall-ah a kharna hun hmangin he Hapta hman chhunga inelna buatsaih a lawmman dawngtute hnenah lawmman hlanna neih a ni.

STAM-Proficiency Award hlan

Mizoram-ah COVID-19 hri kai hmuhchhuah zat ala tlahniam hlei thei lova, niminpiah khan Mizoram-ah Sample 8382 enfiah leh niin heng atang hian COVID-19 hri kai 1080 hmuhchhuah leh niin sample en atanga za zela 12.88 te chuan hri an kai a ni.