Multi Disciplinary Covid-19 Study Team ten Champhai District-an tlawh

Mizoram-a COVID-19 hripui darh mek zirchiang tura sawrkar laipuiin a rawn tirh, Multi Disciplinary COVID-19 Study Team te chuan Inrinni khan Champhai tlawhin COVID-19 hrileng dinhmun an zirchiang.

Imphal Regional Office for Health & Family Welfare, Senior Regional Director Dr. L. Ashananda Singh kaihhruai Central Team-te hian Champhai khawpui chhung bakah Indo-Myanmar ramri dep khua Zokhawthar tlawhin ramri depa COVID-19 hrileng darh zel tur dona kawnga hmalak dan an zirchiang a. Zokhawthar hi tlawh hmasa in ramri kan te uluk taka Screening neih leh COVID-19 hri kai hmuhchhuahte Genomic Sequencing tih a, eng Covid Variant chiah nge a ni tih finfiah tura hmalak a tul thu an tarlang a ni.

Hemi hnu hian Champhai-a CMO Office tlawhin Test kalpui dan, thawktu leh hmanraw neih dante, Contact Tracing kalpui dan kimchang, hrikai enkawlna hrang hrang dinhmun, Oxygen dinhmun, vaccination kalpui dan leh CAB zawm that a hlawh leh hlawh loh te leh tul dangte zawtin an zirchiang a. Heng bakah hian Covid hrikai enkawlna hmunte an tlawh bawk.

Multi Disciplinary COVID-19 Study Team Member rawn kalte hi Regional Office for Health & Family Welfare (ROHFW), Imphal atangin Dr. L.Ashananda Singh, Senior Regional Director leh Dr. R.K. Priyabarta Singh, Senior Regional Director-te an ni a. National Centre for Disease Control (NCDC), Delhi atangin Dr. Vinita Gupta, Consultant Epidemiologist leh Dr. Varun Singh, Epidemiologist-te tel bawkin heng Champhai an tlawhna ah hian Dr. Pachuau Lalmalsawma, State Nodal Officer, IDSP Mizoram & Nodal Officer, COVID-19 ni bawk chuan a tawiawm a ni.

Multi Disciplinary COVID-19 Study Team-te hian October ni 5 khan  Mizoram an rawn thleng a, State Integrated Disease Surveillance Programme (IDSP) hotute leh Aizawl khawpui chhunga CMO pahnihte an kawm bakah District hrang hranga Chief Medical Officer (CMO) te Video Conference an neihpui tawh bawk a ni.