Special Polling Station-ah ECI thu la ngaichang

Tun thla ni 30-a Tuirial bial MLA bye-election lo awm turah Tripura-a tlanchhia Tuikuk te tan Special Polling Station siam anih dawn leh dawn loh a la hriat loh a, Election Department chuan ECI thu an nghak mek.

Mizoram Election Directorate hotute hnen atanga thudawn danin Tuikuk te tana Polling Station hrang siam chungchangah hian Election Commission of India atangin engmah thuthar dawn an la nei lo a, ECI thu leh hla an nghak mek niin an sawi a. Tuirial bial-ah hian Tuikuk vote nei mi 663 an awm nia sawiin, heng mite hi Hortoki Polling Station-ah Voters 176 leh Zodin (Rastali) ah Voters 487 te an ni.

Joint CEO David Liansanglura Pachuau chuan ECI hnenah hian pawl hrang hrang leh Political Party hrang hrangte’n Tripura a inbengbel tawh, Tuirial bial Electoral Roll a hmingchuang mi 663-te hi an hming paih turin ngen a, chu chu Election Directorate pawhin a thawn thla tih a sawi a, ECI chhanna hi an hmuh thuai a rinawm tih a sawi bawk.