Latest News

Mizoram-a hri kai hmuhchhuah tlahniam hret

Mizoram-a COVID-19 hri kai hmuhchhuah chu la tlahniam thei tak tak lo mah se tunhnai ni 4 chhungah erawh hri kai hmuh hi an tlahniam hret hret a, Inrinni-a Sample enfiah 6188 atangin hri kai mi 1170 hmuh leh an ni a, Sample enfiah atanga za zela 18.91 te chuan hri an kai a ni.

Inrinni khan ZMC-a RT-PCR Laboratory-ah Sample 2086 enfiah niin heng atang hian hri kai 451 hmuhchhuah an ni a, an vai hian Aizawl District-a Sample lak te niin Veng leh khua 69 ami te an ni a, Mission Vengthlang-ah hri kai mi 57 hmuh niin Veng mal-a hri kai hmuh tamna ber a ni. Fluorescent Immunoassay (FIA) Test hmangin Inrinni khan Sample 202 enfiah niin hri kai mi 30 hmuh an ni bawk a, an vai hian Aizawl khawpui chhung ami te an ni bawk.

District hrang hranga TrueNat Laboratory-ah Inrinni khan Sample 330 enfiah ni bawkin hri kai mi 70 hmuh an ni bawk a, Champhai District-ah 15, Siaha District-ah 13, Lunglei leh Lawngtlai District-ah 12 ve ve, Kolasib District-ah 9, Aizawl leh Serchhip District-ah 4 ve ve leh Mamit District-ah hri kai mi pakhat hmuh an ni.

Mizoram hmun hrang hrangah Rapid Antigen Test hmangin Sample 3569 enfiah ni bawkin hri kai 619 hmuh an ni a, an zinga 238 te chu Aizawl District-a hri kai hmuhchhuah niin Lunglei District-ah 115, Mamit District-ah 67, Champhai District-ah 52, Siaha District-ah 49, Serchhip District-ah 47, Kolasib District-ah 31, Lawngtlai District-ah 18 leh Saitual District-ah hri kai mi pahnih hmuh an ni.

Nimin khan tlai dar 5:00 thlengin Mizoram-a hri kai zingah mi 965 te chu hri lakah fihlimin anmahni enkawlna hmun atanga chhuahtir an ni a, heti hian nimin tlai dar 5:00 thlenga Mizoram-a hri kai hmuh tawh zhu 1,05,829 ni tawhin an zinga 90,812 te chu enkawl dam an ni ta a, hri kai hmuh atanga zaa 85.81 te chu enkawl dam niin hri kai enkawllai 14,663 an la awm mek a ni.

Hetihlai hian Mizoram-a hri kai zingah nimin tlai thleng khan mi 354 zet an boral tawh a, Inrinni khan hri kai boral mi 3 awm belhin nimin khan mi 6 lai boral an awm leh bawk a ni.

Tunhnaiah Mizoram-a hri kai hmuhchhuah hi a tlahniam hret hret nia chhinchhiah a ni a, chhinchhiahna atanga a lan danin September 26 atanga October 2 kha hri kai hmuhchhuah tam ber Hapta niin hri kai hmuh hi 9,768 (19.20%) a tling a, kar liam ta October 3 atanga 9 chhungin hri kai 8,194 (15.08%) ah a tlahniam a ni. Hri inkaichhawn dan ah Hapta hnih khaikhinin tualchhung inkaichhawng an tam ber ve ve a, kar 2 liamta ah 9740 (99.71%) niin kar liamta ah khan 8,181 (99.84%) a ni bawk a. Ram pawn atanga lo lut chu 0.28% leh 0.15% chauh a ni.

Comments

Chhiar Hlawhte