Mizoram-ah kum 18 chunglam 88.51% ten COVID-19 vaccine Dose 1-na an la tawh

Mizoram-ah COVID-19 Vaccine la thei kum 18 chunglam awm zawng zawng atanga chhuta za zela 88.51 te chuan Vaccine Dose 1-na an la tawh a, tunah hian kum 18 chunglam leh hri danna la thei, pawn chhuak theilo te hri danna pe turin inbuatsaihna kalpui mek a ni.

Kumin January thla atanga COVID-19 Vaccine pek hna thawh hi tluang taka chhunzawm mek zel a ni a, Mizoram-ah hian hri danna la thei kum 18 chunglam mi 7,75,106 awm anga chhut niin heng zinga mi 6,85,969 te chuan Vaccine Dose 1-na la tawhin hei hi hri danna la thei atanga chhutin za zela 88.50 a ni a, hri danna la tawh zinga 4,70,474 te chuan hri danna Dose 2-na la tawhin an Vaccine lak tur an la zo tawh a, hei hi vaccine la thei atanga chhutin za zela 60.69 a ni a, Vaccine Dose 1-na la tawh aanga chhutin za zela 68.58 te chuan Dose 2-na an la tawh bawk a, Mizoram-ah hian Vaccine Dose 11,56,443 pekchhuah a ni tawh a ni.

Hri danna pek mek chungchangah hian State Immunisation Officer, Dr. Lalzawmi chuan kokim zawka Mizoram tuamchhuah tum mek a nih thu sawiin, tunah hian Mizoram puma pawn chhuak thei lo, khum bet-a awm te leh ramtuileilo te chu a hmuna kalchilha hridanna pe turin hmalak mek a nih thu a sawi a. Hetah hian damlo nazawng erawh an pek theih loh thu leh pawn chhuak ngai lo, mamawh tak tak chauh pek an nih thu a sawi. 

Dr. Lalzawmi chuan hri danna dose khatna la duh lo bur an la awm thu pawh sawiin, heng mite hian an lak duh theih nan beihpui an thlak thu a sawi a. Hri danna la duhlo te finchhuaha an lak duh theihna tura puitu tur Mobiliser an ruat thu leh Vawiin atanga training an pek dawn thu a sawi a. Heng mite hian hridanna la duh mi pakhat an hruaiin Rs. 50 zel an hlawh dawn tih a sawi bawk.

Hri danna la duh lo burte tihngaihna vak a awm loh thu pawh State Immunisation Officer chuan sawiin, Insawithaih chingte pawh an la awm lehzel thu leh heng zingah hian sawrkar hnathawk te pawh an tel ve nia an hriat thu a sawi a. Voter ID leh Aadhaar nei ve lo te tana hri danna an lak theihna tur ‘Special Session’ siam a nih thu a sawi bawk.

COVID-19 Vaccine pek hna hi India rampumah kalpui chhunzawm zel ala ni a, mi vbc. 94.70 zetin Vaccine an lak tawh thu sawrkar thuchhuah chuan a tarlang a ni.