Latest News

Chanchin thar thenkhat :

Chief Minister kawm

Chhattisgarh atanga rawn kal MLA pahnih, Lakheswar Bhagel leh Prakash Nayak bakah anmahni rawn zuitu Official te chuan Inrinni khan Chief Minister Zoramthanga chu a Pisa-ah an kawm a, he hunah hian State pahnih aiawhte hian an State ve ve chungchang te leh Culture chungchang te an sawiho a. Chhattisgarh chuan October thla tawp hian National Tribal Dance Festival buat-saih leh an tum thu Chief Minister hi hrilh bawkin, he Kut-ah hian State hrang hrang atangin leh ram pawn atangte chhimtu an neih an inbeisei thu an sawi a ni. Heng Chhattisgarh atanga rawn kal te hi Aizawl-ah la chamin Vawiin hian Art & Culture Department hotute an kawm leh ang.


Volunteer te lawmman pe

Zoram Medical College (ZMC) Director John Zohmingthanga chuan COVID-19 dona kawnga ZMC-a Volunteer-a thawk te lawmman August thla leh September thla ami tur cheng nuai 60.28 chu Inrinni khan sawrkar in a pechhuak fel tih a sawi a. Sawrkar sum harsat lai, sawrkar hnathawk tam takte pawhin hlawh an lak tlai leh lak theih loh laia a tulna hriatthiampuia an mamawh sum te ngaihtuahsak tu Finance Department leh a changtu Chief Minister te chungah lawmthu a sawi a ni. Volunteer-a thawk te hi thla khat zelah Staff Nurse tan Rs. 22,000/-; Lab. Technician leh Data Entry Operator (DEO) tan Rs. 15,000/- zel leh IV Grade te Rs. 8000/- pek an ni.


MJA ten Faina hnatlang nei

Rampum huap-a Faina leh thianghlimna lama beihpuithlakna kal mek an thlawpna lantir nan MJA General Hqrs. chuan Inrinni khan Aizawl Press Club building leh a chhehvel thenfai hna-tlang an nei a, hemi puala inkhawm tawi neih ah MJA General Hqrs. President, Zonunsanga Khiangte chuan Mizoram sawrkar in faina atana ruahmanna a siam dan chu fakawm a tih thu sawiin, kumdang a la hriat ngai chiah loh, Waste to Art Exhibition leh No Tolerance Day hman te chu tha a thu a sawi bawk.


Dr. LB. Sailo boral

Kohhran Thianghlim dintu ber leh Executive Committee Chairman nilai Dr. Lalbiakmawia Sailo, Dr. LB. Sailo ti a hriat, Aizawl Chawlhmun chu nimin khan Ebenezer Hospital, Aizawl-ah a boral a, Vawiin hian Solomona Temple, Kidron Valley, Chawlhhmun-ah vuiliam a ni ang. Dr. LB. Sailo hi hun engemaw chen atang khan Thisen sang leh Zunthlum vangin a lo inenkawl tawh a ni. Kum 1984 khan Kohhran Thianghlim hi dinin kum 1996 atanga Aizawl-a ‘Solomona Temple’ an sak chu mi tam takin an hriatna langsar a ni. Kum 69-a upa Dr. LB. Sailo hian kum 1978 khan Vety Assistant Surgeon (VAS) hna chelhin Feb. 2, 2016 khan AH&Vety Department Director in a pension a ni.


Adviser nihna hlih sak

MNF Party chuan an Adviser ni mek leh MLA hlui Sailothanga Sailo Ex MLA chu Party Adviser a nihna an hlihsak a, Party atang chuan an hnawtchhuak lo thung. MNF hruai-tute sawi danin Sailothanga Sailo hian mitthi ral tur anga insawiin tunhnai khan Tuirial bial hi a tlawh a, MNF kalh zawnga thu a sawi avangin Inrinni khan a nihna hi an hlihsak a a ni. Sailothanga Sailo hi kum 2003 khan Kawnpui bial (tuna Tuirial bial ni ta)-ah hian MLA atan thlantlin a lo ni tawh a. MLA inthlanpui hnuhnung ber, 2018-ah khan helai bial-ah bawk hian MNF Candidate ni lehin hemi tuma thlantlin Independent Candidate Andrew H. Thangliana chu Vote 217 in a hneh lo a ni.


Campaign Office hawng

Tuirial bial-a Assembly bye-election neih tur atan MNF Adviser Lalruatkima chuan Inrinni khan Hortoki-ah MNF Campaign Office hawngin, “He bial-ah hian hmasawnna hna thawh tur tam tak a awm a. Heng te tihlawtling tur hian power a ngai a, chu power chu tunah rih chuan MNF kutah a awm mek,” tiin hmasawnna hna thawhna tur power kawl mektu MNF party candidate lo thlang tling ngei turin Tuirial bial mipuite chu a ngen a. “Midang an tha lo e ka tihna ni lovin, midangte ai chuan Pu K. Laldawngliana in lo thlantlin chuan in inchhir hauh lovang,” a ti bawk.

ZPM Party pawhin Inrinni vek khn Hortoki ah hian bye-election neih tur atana Campaign Office hawnna an nei a, he hunah hian an Party Working President K.Sapdanga chuan an Candidate chu Tuirial bial hrechiangtu leh a  theih-tawpa khawtlang tana hna thawk thin a ni tih a sawi a. “Kan ram siamtha tur chuan thil pathum kan mamawh a, dikna, rinawmna leh huaisenna te an ni. Dikna leh rinawmna te a dinchan theihna tur chuan kan huaisen a ngai a ni,” a ti bawk.

Comments

Chhiar Hlawhte