Latest News

Chhimchhak Presbytery Inkhawmpui neih mek a ni

Serchhip District chhunga Presbytery lian ber, Chhimchhak Presbytery Inkhawmpui vawi 98-na chu nimin atang khan Serchhip Bethel Kohhran-ah neih a ni a, naktuk Pathianni thleng a awh ang.

Presbyterian Kohhran-a rorelna sang ber dawttu, Presbytery Inkhawmpui neih mekah Chhimchhak Presbytery Inkhawmpui-ah hian thupui atan ‘Tho la i Pathian ko rawh’ (Jona 1:6) chu hman niin nimin khan Upa nemngheh tur te Exam neiin Committee hrang hrang thutkhawm neih a ni bawk a, Vawiin hian Rorel Inkhawm neih zui tur a ni anga, naktuk-ah Upa nemngheh inkhawm neiin Upa atan mi 6 nemngheh an ni anga, chawhnu lamah Upa boral sunna hun hman tur niin Upa boral mi 6 te sun an ni ang.

Vawiin-a Chhimchhak Presbytery Rorel neih turah hian Agenda zingah Serchhip Bial atanga lut ‘Pathian biak inkhawm tih tlem ni rawh se’ tih chu telin New Serchhip Bial atanga lut ‘Serchhip-ah ruihhlo ngai te enkawlna Synod Rescue Home din ni rawh se’ tih chu a tel bawk a, Upa KL. Pakunga, Chhiahtlang Kawn Veng Bial chu Moderator thar tur a ni bawk ang.

Chhimchhak Presbytery-ah hian Pastor Bial 5- Serchhip, Chhiahtlang, New Serchhip, Serchhip Vengchung leh Chhiahtlang Kawn Veng Bial te awmin Kohhran 24 a awm a ni.

Comments

Chhiar Hlawhte