Mizoram Sawrkarin State pawn atanga kawlphetha leina man ba Vbc.47.21 a nei

Mizoram sawrkarin September 2021 thleng khan State pawn atanga kawlphetha leina man la pek loh cheng vbc. 47.21 zet a nei a. Hetihlai hian tun dinhmunah Small Hydel Project (SHP) leh Solar Plant hmun 10 a siam turin hmalakna kalpui mek a ni thung.

Power & Electricity Department-in RTI Zawhna a chhan danin, kum 2020-21 chhung khan State pawn a kawlphetha hralhna man atangin Mizoram sawrkar in cheng vbc. 34.5095 a hmu a, hetihlai hian September 2021 thlenga State pawn atanga kawlphetha leina man la pek loh/ba awm zat chu cheng vbc.47.21 a tling.

RTI chhanna a tarlan a nih danin, kawlphethaa Mizoram a intodelh theihna turin, Mizoram sawrkarin hmalakna hrang hrang a nei a, chungte chu; MW 20 siam theihna tur Vankal Solar Plant (siam mek) te, Saitual Solar Plant MW 10 (siam mek) te, Tlawva SHP MW 5 (commissioning tih mek) te, KW 100 siam thei tur Tuiching (siam zawh tawh, la commission loh) te, Tuiriza KW 100 (siam zawh tawh, la commission loh) te, Kawlbem MW 4 (siam mek) te, Tuivawl MW 42 (DPR siam tawh), Iva MW 3 (DPR siam tawh), Ngengrual MW 1 (DPR siam tawh) leh Khawiva-II MW 0.7 (DPR siam tawh) te an ni.

Tun dinhmuna Mizoram in Hydel Project 11 a neih te chu Small Hydel Project a ni tlangpui a, chung zingah chuan tun dinhmunah kawlphetha siam theih zat (installed capacity) siam chhuak thei an awm lo. Mizoram in SHP a neih len ber, Serlui B, MW 12 pe chhuak thei tur pawhin tunlaia kawlphetha a siam theih zat chu MW 3.96 chauh a tling.