Serchhip-ah Faina Hapta kharna leh lawmman semna hun hman a ni

Tun thla ni 2 atanga Serchhip-a Faina Hapta (Cleanliness Week)-2021 hman chu nimin khan Serchhip DC’s Conference Hall-ah a kharna hun hmangin he Hapta hman chhunga inelna buatsaih a lawmman dawngtute hnenah lawmman hlanna neih a ni.

Serchhip-a Faina Hapta kharna hunah hian khuallian Serchhip District Bawrhsap Kumar Abhishek IAS chuan Faina lamah Mizote kan thangharhin fai hlutzia kan hre tlang tawh viau chu lawmawm a tih thu a sawi a. Amaherawh chu fai tura hmalakna pawimawh tak tak leh khuarei daih tur chi lamah erawh tan kan lak leh deuh a tul nia a lan thu sawiin, “Kan bawlhhlawh tawih thei chite chhungtin ten leithaa chantir uar ila, kan hmanraw hluite thildang tangkai taka hman theih dan dap uar bawk ila, Plastic lam chite fel taka thliarin sawrkar Dan angin paih zel bawk ila, he ram hi nakin thlenga kan tu leh fa te chenna tlakah kan siam ngei dawn a ni,” a ti. Bawrhsap chuan Faina Hapta chhunga hmalakna chi hrang hranga mawhphurtute, veng chhung leh mahni In leh a chhehvel tifaia beitu zawng zawngte chungah lawmthu a sawi a. District fai inelna neih zui lehnghal a nih avangin mitinin theihtawp chhuah zui zel turin a sawm bawk.

Serchhip District Information & Public Relations Officer K. Saitluanga MIS kaihhruai he hunah hian District Urban Development Officer, Dr. Albert Vanlalliantluanga chuan kumin a Faina Hapta leh AKAM Plan hnuaia an hmalakna hrang hrangte tarlangin, Faina Hapta khar a nih hnu, Vawiin atang hian Mizoram khawpui fai inelna chu kalpui tan leh nghal a ni dawn tih a sawi a, hei vang hian Faina kawnga hmalakna te chu chawlhsan theih a nih loh thu a sawi a. NULM-a Manager, Lawmzuali chuan Faina Hapta hman chhunga hmalakna hrang hrang te a lem nen a entir bawk a ni.

Nimin-a he hun hmanna ah hian Faina Hapta hman chhunga inelna hrang hranga lawmman semna neih niin, Faina lam hawi thuziak tam nitin chanchinbu-ah pakhatna Serchhip Times, pahnihna Lenkawl leh pathumna Laisuih te an ni a. Faina Hapta denchhena Thlalak inelna ah mi 18 telin pakhatna B. Vanlalthazuala (Ram-thlun Veng), pahnihna RL. Hlupuia (IOC Veng) leh pathumna C. Lalrochhuanga (New Serchhip) te an ni a. Videography (1 minute Mobile Video Clip) intihsiakna ah mi 8 telin Vanlalhruaizela (Zion Veng) chu pakhatna niin Lalhmachhuana (Hmar Veng) chu pahnihna leh RL. Hlupuia (IOC Veng) chu pathumna an ni bawk.