Latest News

Serchhip District Bawrhsap in Zawlpui phai tlawhin leilet neitute nen inkawmna an nei

Serchhip District Bawrhsap Kumar Abhishek IAS chuan nimin, October 8, 2021 tlai khan Serchhip bul Mat lui kam, Zawlpui zau-a Buh chingtute an leilet-ah tlawhin hma an sawn zel theihna tura an mamawhte a sawipui.


District Bawrhsap hi Serchhip DAO, Tlangtimawia Zote leh Zawlpui FMC hruaitu ten lo dawngsawngin loneitute nen an inkawmna ah loneitute hian harsatna an tawh leh an mamawh te lo thlenin, Electric line darh zau zawk an mamawh thu te, Zau chhung leilet hrang hrang panna kawng an mamawh belh dante, leilet thenkhat Tuikawng zawl leh lutuk vanga an harsatna leh Tui lakna li (diversion) an mamawh belh thu te an lo thlen a ni.

District Bawrhsap chuan loneitu ten an mamawh hrang hrang an lo thlen te chu a changtu Department te a lo sawipui tur thu loneitute hi hrilhin, FOCUS kaltlanga hmalak theih chi te pawh a dap pui tur thu a sawi a. Leilet neitu pakhat, Hmangaihthangi’n a Thlam a kan avanga Thlam a neih loh mek thu leh Buh seng dawn hnaih anih vang chawpchilh taka Thlam a mamawh thu a lo thlen chu Bawrhsap chuan Silpauline a pek tur thu sawiin, Serchhip DAO Tlangtimawia Zote chuan Hmangaihthangi te leilet kiang mai-a Agriculture Department Waiting Shed chu Bawrhsap Silpauline pekte hmanga a bang siama buhseng zawh hma zawnga an lo hman lailawk a remtihsak nghal a ni.

He hunah hian Serchhip District Bawrhsap chuan leilet neitute chu bawlhhlawh leh hnimhnah te hmanga leitha siam lam uar tura fuihin, hei hi kawng dik zawka bawlhhlawh tihral nan leh Chemical hman pumpelh nan a pawimawh thu a sawi bawk.

Serchhip bul Mat phai-a Zawlpui zau-ah hian chhungkaw 65 velin Buh an ching mek a, tunah hian Leilet neitute chuan an leilet te thlo zo tlangpui tawhin Buh thar rang chingtute chuan tun thla hian buh an seng tan thei dawn a, Zawlpui-a leilet neitute hian nikum khan Buh phur 6000 vel tharin, kumin hian nikum aia tam an tharchhuah theih an in beisei thu nimin-a helai hmun tlawhtute hi an hrilh bawk a ni.

Comments

Popular News (Last 30 Days)