Lenkawl

Mi 6 enkawl dam leh tawh

Nimin thleng khan India ramah COVID-19 kai hmuhchhuah mi 5,48,318 tling tawhin nunna chan mi 16,475 an tling tawh bawk.

Chief Minister, Zoramthanga chuan Mizoram in Remna Ni kan thleng leh ta chu lawmawm a tih thu sawiin, mipuite chibai a buk.

Serchhip Bazar-a chawhmeh zuartu pawl, Serchhip Bazar Welfare Association hruaitute chuan nimin khan Serchhip District Bawrhsap leh District Level Task Force Committee Chairman, Dr. Lalzirmawia Chhangte chu a Pisa-ah hmuin COVID-19 avanga harsatna tawkte tanpuina atan Rs. 3000/- an hlan a, Bawrhsap chuan an thilpek chu lawm taka dawngin, an inpekna ah lawmthu a hrilh bawk. Hemi hmalam hian Serchhip Bazar Welfare Association hian COVID-19 avanga harsatna tawk an member mi 10 hnenah tanpuina sum Rs. 1000/- theuh an lo hlan tawh bawk a ni.

Serchhip Sub-Hqrs. YMA Vigilance & Monitoring Committee chuan nimin zing khan Serchhip Bazar building sak mek chu a hmunah tlawhin hnathawh mekte an en a, hnathawh tah tawklo nia an hriat chu siamtha turin hnathawktute an ngen bawk.

Hri leng avanga Serchhip District-a inkhung-hrang te chu hri lakah an him tin nemngheh a nih hnuah chhuahtir zel niin nimin thleng khan mi 28 an la inkhunghrang a. Heng zinga 25 te hi sawrkar hmunhma-a inkhunghrang te niin midang 3 hi Dedicated COVID Health Centre-a inkhunghrang te an ni thung.

Serchhip Sazuar Association (SSA) te chuan nimin, June 29, 2020 atanga hman tan turin Serchhip Bazar-a Sa man an bithliah thar a, an rate siam aia to-a Sa zuar te chu an chawitir zel dawn tih an sawi bawk.

Integrated Child Protection Scheme (ICPS) hnuaia din, Jail Inspection Team te chuan nimin khan Serchhip District Jail tlawhin naupang, kum tlinglo tang an awm leh awmlo an enfiah.

Chief Minister, Zoramthanga hova COVID-19 dona atana hmalakna hrang hrang thlirhona leh kal zel dan tur inrawnkhawmna nimin-a neih chuan Mizoram-a COVID-19 hrileng dinhmun ziaawm zel thlir chungin July ni 1, 2020 atangin zangkhai zawka Lockdown kalpui a rel.

Kumin chhungin May thla thleng khan Mizoram-ah Malaria hrik kai mi 2058 hmuhchhuah an ni tawh.