Jail Inspection Team ten Serchhip District Jail tlawhin tang mi 22 an awm mek

/
Integrated Child Protection Scheme (ICPS) hnuaia din, Jail Inspection Team te chuan nimin khan Serchhip District Jail tlawhin naupang, kum tlinglo tang an awm leh awmlo an enfiah.
Nimin-a Serchhip District Jail tlawhtu, Jail Inspection Team te hi Serchhip-a Principal Magistrate, JH. Lalparmawii chuan hovin Serchhip District Jail-ah naupang kum tlinglo, nu leh pa tan avanga tang an awm leh awmloh leh an dinhmun te Quarterly-a enfiah tura tih an nih angin an enfiah a, he Team-ah hian member atan Juvenile Justice Board (JJB) Member mi 2 bakah District Child Protection Unit (DCPU) atangin mi 2 leh YMA Sub-Hqrs. Serchhip leh MJA Serchhip District aiawh mi pakhat ve ve an tel a, tun dinhmunah Serchhip District Jail-ah hian kum tlinglo tang an awmlo a ni. Nimin a Serchhip District Jail an tlawhna ah hian Jail Inspection Team hian Hmui tuamna (Face Mask) 30 leh Kut silfaina (Hand Wash) bur 3 an pe nghal bawk a ni.
Tun dinhmun ah Serchhip District Jail-ah hian tang mi 22 an awm mek a, heng zinga 20 chu mipa niin midang 2 hi hmeichhia an ni thung a, Jail tang zinga 5 te hi an thubuai chinfel tawh leh tang mek niin midang 17 te hi an thubuai chhui lai leh ngaihtuah lai an ni thung.
Serchhip District Jail enkawltute chuan Jail tunhnaia rampum-a inkharkhipna kalpui a nih hnuah Jail tang te himna turin theihtawp chhuaha hma an lak thu sawiin, rampuma kalpui a nih angin Lockdown kalpui tirh khan Jail tang, an thubuai ngaihtuah lai mi 22 te chu intiamkamna ziaka chhuahtir an nih thu a sawi a. Hemi atang hian Jail tang te tlawh thin dan kalphung pawh tih danglam niin a hmaa Jail tang leh a tlawhtute inkawmna neih thin te pawh neih phal a nih tawhloh thu an sawi a. Jail-a dahluh turte reng reng chu a hmaa lo tang tawhte nen an awmkhawm hmain ni 14 chhung khunghran an nih zel thu leh hemi atan hian mipa tan Ward pathum (3) leh hmeichhia tan Ward pakhat ruahman a nih thu sawiin, ni 14 khunghran an nih hnuah hian Nurse ten an dinhmun an enfiah hnuah chauh midang zingah dahluh thin an nih thu an sawi bawk.
Serchhip District Jail enkawltute chuan tun dinhmunah harsatna lutuk an tawhloh thu pawh sawiin, Tui leh Eng te pawh an dawng tha rih tih an sawi a, Serchhip District Jail-ah hian Superintendent hovin thawktu mi 27 an awm mek thu an sawi bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »