Serchhip-ah Sa man tisang

Serchhip Sazuar Association (SSA) te chuan nimin, June 29, 2020 atanga hman tan turin Serchhip Bazar-a Sa man an bithliah thar a, an rate siam aia to-a Sa zuar te chu an chawitir zel dawn tih an sawi bawk.
Serchhip Sazuar Associarion te hi Pathianni khan thukhawmin tunlaia ran vang zel avangin Serchhip Bazar-a Sa Kg. man chu an bithliah thar a, hemi ang hian Vawk sa chu Kg. khat Rs. 400/- a ni tawh anga, Bawngsa chu Kg. 1 zelah a Thin Rs. 700/-, a Ti hlang, a kawchhung leh a Irno Rs. 600/- niin a ruh sahpawlh chu Rs. 500/- a ni tawh dawn a, he an rate siam aia sang-a Sa lo zuar an awm a nih chuan Rs. 3000/- zel chawitir an nih dawn tawh dawn thu pawh sawiin, a hmaa an rate aia sang-a lo zuartur mi thenkhat te pawh pawisa chawitira hrem an ni bawk.
Serchhip-a Sa zuartute chuan tunlai hian Vawk leh Bawng ser tur a vang hle tih sawiin, Sa rate san zawkna khawdang ten Serchhip District-ah pawh ran an rawn zawn zel avang leh ranvulhtute pawhin a to theihna zawkah chuan ran hralh an duh zawk avangin loh theihloh a sa Kg. man hi tihsan a tul thu an sawi a. Tunah hian Sa sat thin tam zawkte chuan ran an hmuh theih tawhloh laiin Sa rep zuar thin ten ran hi man to zawk-a lain anni chuan an in sah hlawh mai thin thu an sawi a, hei vang hian mipui zingah sa Kg. lei duhte pawhin lei tur an neihloh phah thin niin an sawi a. Heng an harsatna tawh te hi mipuite pawhin lo hriatpui se an duh thu an sawi bawk.
Hetihlai hian Serchhip DC Office chuan naktuk, July 1, 2020 khian Sa rate chungchang sawihona nei turin Meeting nimin khan an ko thung.

Comments

Chhiar Hlawhte