July ni 1, 2020 atangin Mizoram-ah Lockdown zangkhai zawka kalpui rel a ni

Chief Minister, Zoramthanga hova COVID-19 dona atana hmalakna hrang hrang thlirhona leh kal zel dan tur inrawnkhawmna nimin-a neih chuan Mizoram-a COVID-19 hrileng dinhmun ziaawm zel thlir chungin July ni 1, 2020 atangin zangkhai zawka Lockdown kalpui a rel.

Assembly Annexe Conference Hall-a he inrawnkhawmna hunah hian Chief Minister chuan COVID hrileng chuan mipuite kan nunphung pangngai tikhaihlakin, inkharkhip in hun rei tak kan awm tawh tih sawiin, vanneihthlak takin hma kan sawn zel nia a lan thu a sawi a. Mizoram-a hrileng dinhmun ziaawm chho ve zel mahse India ram pumah chuan a chim sang lai a la thleng dawn chauh tia sawi a nih avangin fimkhur taka kan awm chu kan thlah nghal vek a fuh lo ang tih sawiin, chutihrual chuan mipuiin kan tlin tawk leh kan zawh tawh ngaihtuah chungin kan him tlanna tur ngaituah tel bawkin hma lak zel a tul thu a sawi a. Kan economy leh nitin nun dan tibuai lutuk si lo him thei ang ber si-a kaldan thiam a tul thu a sawi bawk.
He hunah hian Health Minister, Dr. R. Lalthangliana chuan hri leng chungchanga Mizoram dinhmun sawiin, Post-Lockdown kalpui dan tur uluk taka ngaihtuah a, a zawmtu turte pawhin theihtawp kan chhuah tlan a ngaih tur thu a sawi a. COVID-19 Dedicated Hospital ZMC-ah damlo mi 160 dah theihna tura ruahman chu Covid damlo an awm (admit) tam ber laiin mi 70 an tlinglo tih a sawi bawk.
He hunah hian Home Minister, Lalcham-liana pawhin Task Force duty te leh Police Flying Squad ten lockdown bawhchhia te atanga pawisa chawitir tlingkhawm chu Rs. 28,91,800/- a tlin tawh thu leh hri laka Mizoram mipuite an him theihna tura venhimna hna thawh dan a sawi a, Home Minister chuan Mizoram mipui Covid hrileng laka an him theihna turin mi 2900 chuang zet chu Post 491-ah duty an awm thu sawiin, Post 339-ah Task Force Duty in, Post 27-ah Police an duty bakah post 125 ah Task Force leh Police te an duty kawpna a awm thu a sawi a. Task Force mi tlawmngai tak takte an rim tawh em avangin duty dan pawh inchhawk zangkhai dan awm se tiin rawtna a siam bawk.
Mizoram Chief Secretary, Lalnunmawia Chuaungho pawhin tuna Mizoram dinhmun tlangpui tarlangin, Mizoram State pawn atangin tangkhang mi sing khat chuang hruaihaw an nih tawh thu a sawi a, heng mite khunghran an nih dan sawiin, khunghran te zinga zaa 55 chu sawr-kar hmunhmaa khunghran an nih thu leh zaa 25 te chu Kohhran leh khawtlang buatsaih hmunhma a khunghran an nih thu a sawi a. A bak zawng chu In lama inkhunghrang leh man chawi-a Hotel-a inkhunghrang an nih thu a sawi bawk.
Mizoram-a hri leng avanga inkhung-hrang te zinga zaa 92 chu sawrkar-in an ei leh in a tumsak niin, a bak zaa 8 chu Kohhran emaw, khawtlang/Task Force in a tumsak emaw, mahni a intum an ni thung. India ram hmundang atanga lo haw tur sawrkar in an lo kalna tur buaipui ngai mi tlem la awm chu Task Group leh an awmna Mizo Welfare te nen ruahmanna siamin an lo haw thuai beisei a nih thu pawh Chief Secretary chuan sawiin, Sawrkarin a buaipui ngailo-a mahni duh thu a thlawhna a lo haw an awm zel thin thu a sawi bawk.
He thutkhawm-a tel te hian ramri a Local Volunteer Duty te tan a zangkhai zawka rua-hmanna siam te rawt niin, khawpui a zan lam curfew chu a pangngai a la kal zel tha an ti tlang a. Lockdown thar kalpui dan tur kimchang chu State Executive Committee of State Disaster Management, DM&R in an ruahman ang.
He hunah hian Assembly Speaker, Lal-rinliana Sailo, Information Minister Lalruatkima leh H&FW Board Vice Chairman, Dr. ZR. Thiamsanga te pawhin thu sawiin, Lockdown inthlahdul tan dawn mah ila, mipui kan la fimkhur tlan viau a tul thu an sawi bawk a ni.

Comments

Chhiar Hlawhte