Chanchin thar thenkhat :

Mi 6 enkawl dam leh tawh

Mizoram-a COVID-19 hri kai enkawl zinga mi 6 te chu nimin khan damdawi In atanga chhuahtir niin tun thlengin hri kai zinga 61 te chuan damdawi In an chhuahsan tawh. Hemi chungchanga nimin-a sawrkar thuchhuah tarlan danin State Referral Hospital, ZMC a COVID-19 hri kai enkawl mek zinga Aizawl District mi 5, Mipa 4 leh Hmeichhia pakhat bakah Champhai Dedicated Covid Health Centre-a enkawl hmei-chhe pakhat te chuan nimin khan dam takin damdawi In an chhuahsan a, heti hian Mizoram pumah hri kai hmuhchhuah mi 151 atangin mi 61 te chuan damdawi In an chhuahsan tawh a, midang 90 te erawh chu enkawl mek la niin hri kai zawng zawng atanga chhutin za zela 40.36 te chu enkawl dam an ni tawh a ni.

MLA in hnathawh enfiah

LAD changtu leh Kolasib bialtu MLA ni bawk, K. Lalrinliana chuan nimin khan a bial chhung Diakkawn Village Council Area-a MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a. A bial chhung mipuite chu heng Fund te hi an ta a ni tih hriaa hnathawh te enpui ve fo thin turin a chah a, MLA Fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, Steel Structure hmanga nalh zawk leh tha zawka siamtha tur leh estimate pawh siam tha leh turin a ti bawk.

Tuikhurhlu-ah chenna In kang

Nimin zing dar 10:30 vel khan Tuikhurhlu-a Vanlalthlana te chenna In chu a kang a, bungrua engmah chuh hman ni lovin mihring thi leh hliam an awmlo thung. Thudawn danin he In-ah hian Vanlalthlana te nupa bakah an fate pathum an khawsa a, nimin khan In neitute nupa bakah an fa upa ber te hnathawk tura chhuakin naupang pahnih te chu an chhungte In-ah an leng thung a, hemi hlan hian an In hi kangin kangmei chhuah chhan hi chiang taka hriat ni lo mah se electric kalsual vang nia rin a ni.

MSU in CM hnenah an thlen

Mizo Students’ Union (MSU) General Hqrs. hruaitute chuan nimin khan Chief Minister, Zoram-thanga chu a Pisa-ah hmuin tunhnaia Assam lamin Mizoram chhunga dawr an rawn siam a hmun, Vairengte dai ami chu an tlawh thu sawiin, helai hmun hi Mizoram chhung ngei a ni tih an finfiah thu an sawi a. State dang laka kan ram kan chan zel lohnan ramri a duty te thuam chak turin an ngen nghal bawk. Hei bakah hian MSU chuan COVID-19 avanga State pawn atanga lo haw turte haw theih hunchhung siam turin an ngen bawk. He hunah hian MSU hian Chief Minister Relief Fund-ah Rs. 10,000/- an chhunglut nghal bawk.

Vawiin Remna Ni

Vawiin June 30, 2020 hi India leh MNF ten inremna an ziahna Ni, Remna Ni a ni a, he Ni hi sawrkar Pisa chawlh a puan a nih angin sawrkar Pisa hrang hrangte khar a ni ang. Remna Ni pual hian MZP chuan zanin dar 8:00 hian Ignite Sudio-ah hun an hmang dawn a, hei hi Cable TV lamah live a pekchhuah tur a ni ang.

Vawiin-a Remna Ni pual hian MNF Thalai, Mizo National Youth Front (MNYF) te chuan Mizoram Blood Bank hrang hrang ah midangte tana thisen pekna an buatsaih dawn a, Serchhip-ah pawh thisen pek hun hi buat-saih tum a ni bawk.