Remna Ni-ah CM in mipuite chibai a buk

Chief Minister, Zoramthanga chuan Mizoram in Remna Ni kan thleng leh ta chu lawmawm a tih thu sawiin, mipuite chibai a buk.

Vawiin a Remna Ni puala thuchah a siamah Chief Minister chuan Mizoram remna hi kum 1971 atang khan inremna nei tura theihtawpa beih a ni tawh tih sawiin, “Amaherawhchu a kaltluang thei lova, a ruka inbiakna te a awm hnuin kum 1976 atangin mipui hriatah khawvel hriatah a lang apauva inbiakna neih a ni a. Chumi hnu kum 10 hnuah 1986 ah inremna chu neih a ni ta,” a ti a. Inremna lo awm chhan ber chu kan Political Party zawng zawngte, Zoram mipui zawng zawng te, NGO leh Kohhran ten theihtawpin Pathian hnenah tawngtaina in an dil a. Chu tawngtaina chu Pathianin a chhang tih sawiin, ramhnuaia MNF te leh India Sawrkar chuan June ni 30, 1986 ah inremna an lo sign thei ta a ni, a ti.

Chief Minister chuan he inremna hi ramhnuaia MNF te duh ang thlapa siam a ni lo tih sawiin, India Sawrkar duhdan ang thlapa siam pawh a ni lo tih a sawi a, “Amaherawhchu, Mizoram mipui te duhdan ang vek pawh ni bik chuang lova, Pathian in Mizoram tana tha tawk a tiha a pek; chumi anga inremna chu siam, kan vaia kan sirtluk theihna niin a lang a. Chuvangin he inremna hi Pathian min pek anga Zoram hian he inremna hi nei kan ni tih hi kan ngaih dan a ni,” a ti a. “Mizoram kum 20 chhung India ram zawng zawnga ram buai ber chu remna India ram remna siam tawh zawng zawngah hlawhtling ber. Chu chang chu ni lovin khawvel ah pawh a hlawhtling ber te zinga mi niin a lang a. Chutiang chu kan lo thleng ta hi Pathian thilpek Pathian malsawmna liau liau a ni,” a ti bawk.