Lenkawl

Serchhip-a AH&Vety Department chuan an Department hnuaia Family Oriented SEDP dawngtute chu 2nd Instalment pe turin hma an la mek a, karleh lamah sum hi pekchhuah hman an beisei tih an sawi.

Nimin March 15, 2023 khan khawvel pum ah ‘World Consumer Rights Day’ hman niin Serchhip-ah pawh DC Conference Hall-ah he ni hi District Bawrhsap Nazuk Kumar IAS hova hman a ni.

Nimin tlai dar 3:30 vel khan Serchhip Town chhung Bukpui leh Chhiahtlang inkarah mi 5 chuanna mimal Car pakhat chesualin Motor a chuang mi 5 te chuan hliam an tuar a, an zinga pakhat chu nizan khan ZMC lama enkawl tura phurh a ni.

Serchhip-a Excise & Narcotics Department chuan nimin chhun dar 11:30 vel khan Serchhip Bazar-ah Heroin Hawng 5, gram 69.96-a rit chu an man leh a, a neitu nia hriat Lalrinzuala (32), Khawmawi (Myanmar) nia insawi pawh manin thubuai siam sak nghal a ni.

Kumin-a Mizoram Legislative Assembly Inthlanpui neih tura Congress Party in Serchhip Bial-a an Candidate tur R. Vanlaltluanga chuan nimin khan Serchhip-a MJA Member te kawmin Mizoram hian sawrkar thar, Corruption laka fihlim, ‘Say No Corruption’ ti tur mi a zawng mek nia a hriat thu a sawi.

Serchhip District-a MCS hna thawklai te zingah a tam zawk chu an awmna leh an hna chelh mek siksawi a ni.

Mizoram sawrkar Directorate of Information and Communication Technology leh Serchhip Sub-Hqrs. YMA buatsaihin nizan khan Serchhip Sub-Hqrs. YMA Conference Hall-ah IT Awareness neih a ni a. He hun hi Serchhip Sub-Hqrs. YMA President Kawlthuama chuan kaihhruaiin ICT Department a\angin Informatics Officer Lalengzuala chuan Digital India hnuaia sawrkar hmalakna te, Social Media hrang hrang hman fimkhur a pawimawhna te, Digital Transaction chungchang leh Cyber Security chungchang te zirho a ni.

Serchhip-a Excise & Narcotics Department chuan nizan hmasa dar 6:30 vel khan Thenzawl Hermon Veng-ah Heroin Hawng 15 an man a, a vaiin gram 188.16-a rit niin he thil a inhnamhnawih leh a neitu nia hriat Zoramhmangaiha (32), Chhiahtlang Kawn Veng nia insawi pawh manin thubuai siam sak nghal a ni.

Serchhip District chhunga Registrar of Marriages te tana kumtin an hnathawh dan inzirtir tharna neih thin chu nimin khan Serchhip-ah neih leh a ni.

Assam Rifles ten Phawngpui Expedition an buatsaih-a tel Mizoram Outdoor Youth Adventure Club-a thalai mi 30 kalte chu nimin khan Serchhip-a 42nd Bn. Assam Rifles ten an Battalion Hqrs. ah lo dawngsawngin inkawmna an nei.

Serchhip District Police te tana tun sawrkar kum chhunga In-Service Training hnuhnung ber tur chu nimin khan Serchhip-ah neih tan a ni a, he hun hi Serchhip SP Stephen Lalrinawma chuan hmanpuiin, Police te chu Dan lekkawhtu ni mah se Dan chung leng an ni lo tih in hre reng turin a chah.

Mizo thalai Sipai-a intlar duhte tan Serchhip-a awm 42 Battalion Assam Rifles leh MJA Serchhip District te chuan Inrinni khan Sipai-a intlar tura inziahluhna hun an buatsaih a, Vawiin hian chhunzawm leh a ni ang.

Serchhip-a Excise & Narcotics Department chuan nimin chawhnu dar 3:00 vel khan Serchhip Bazar-a Heroin Hawng khat, gram 13.17 a rit chu an man a, a neitu nia hriat Ngurhmingliani (44), Serchhip Chanmari Veng nia insawi pawh man nghalin thubuai siam sak nghal a ni.

Serchhip Dinthar Branch YMA te chuan Serchhip Mat Phai-ah Sava bu siamchawp chu Inrinni khan hmun hrang hrangah an dah.

PHE Department in Electric khawl hmanga Tuikum lui tui an pump-na tur khawl thar chu Serchhip thlenpui a nih hnuah Vawiin atang hian khawl bun hna thawh tan a ni dawn a. PHE Department hotute chuan khawl bun hna thawh chhung hian Diesel khawl hmang chauha Tui hi pump theih a nih dawn avangin harsatna thleng lo thei tur ang bera hma an lak thu sawiin, Thawh-tanni-ah hian Consumers 1200 vel Tui pek a tul thu leh heng te hi Pump khawl vekin Fire Hydrant pathum pawh dah khah vek a nih thu an sawi a, tunah hian Tui pump sa litre 36,00,000 an neih thu leh mipuite tan harsatna lian thleng lo tura an beisei thu sawiin, harsatna dang a awm loh chuan naktuk zan-ah emaw Company mithiamte nen khawl hi enchhin hman an beisei thu an sawi bawk a ni.

Serchhip Town Joint Village Council chuan Serchhip khawpui lun laia Cable TV leh Internet hrui zam tam lutuk tihfel dan kawng zawn nise an ti.

Zirlai naupang ten an zirlaibu baka nitin khawsakna kawnga thil pawimawh te an thiam theihna tura ruahman, Block Level Rangotsav Competition (for Elementary School) chu nimin khan Serchhip AOC Veng-a Midland M/S-ah neih a ni.

Serchhip bialtu MLA Lalduhoma chuan nimin khan Thenzawl-a Victory English School ten Annual Closing Day leh lawmman semna ni an buatsaih chu hmanpuiin, “Kan ram leh hnam hmelma lian ber pahnih chu Corruption leh Ruihhlo a ni,” a ti a. Heng te hi do turin zirna In atanga hmalak a tul thu a sawi bawk.

Assam Rifles-a tang duh te tana Online hmanga dilna thehluh hun hawn mekah MJA Serchhip District leh 42 Bn. Assam Rifles chuan inziahluh kawnga harsatna neite Vawiin atang hian an buaipui dawn a, Sipai-a tang duhte tan hian Vawiin chawhma dar 10:00 hian Serchhip Press Club leh Assam Rifles Camp te pan theih niin document pawimawh te ken nghal tur a ni ang.

Mizoram sawrkar in kumin atana Lo hal hun hnuhnung a bituk chu la ral lo mah se Serchhip leh a chhehvel-a Lo nei tur hrang hrang te chuan Lo an hal zo dawn hnai tawh niin a lang a, Sawrkar in kumin atana Lo hal hun a bituk hnuhnung ber chu karleh Nilaini khi ni mah se tunhnaiah khaw awmdan in a zir loh deuh avangin Lo vat tam ber te chuan an Lo te an hal tawh a ni. Hetihlai hian Lo hal avanga kangmei chhuak erawh hriat tur a awm meuh rih lo thung a, hmun thenkhat ah ram kang te awm bawk mah se khawtlang mipui tana thelh harsa khawpa kangmei chhuak nasa erawh hriat thu a awm lem lo nia thudawn a ni bawk.