Sava Bu siamchawp dah leh

Serchhip Dinthar Branch YMA te chuan Serchhip Mat Phai-ah Sava bu siamchawp chu Inrinni khan hmun hrang hrangah an dah.
Serchhip Dinthar Branch YMA te hian ramngaw, nung-cha leh luidung humhalh hna an kalpui mekah Sava Bu tur engemaw zat siamin heng te hi Inrinni khan Serchhip Mat phai-a luidung an humhalh, Chawm kai leh a chhehvel-a thingkung remchang ah te an dah a, tun tumah hian Sava Bu tur 11 dahin hemi hmalam hian Sesah lui hnar an ram humhalh ah engemaw zat an dah tawh bawk a ni.

Serchhip Dinthar Branch YMA te hian Mat lui Chawm kai atanga lui mawng lam Pu Zangenga kai thleng humhalhin Inrinni khan an luidung humhalh chhungah hian Sangha chaw an pek bakah lui ding humhalh chhinchhiahna te tar tharin luidung thenfai ngai te an thianfai bawk a. An luidung humhalh chin ah dan bawhchhe zawnga che lo tura mipuite chu ngenin, an hmalakna te theihtawp chhuaha thlawp turin an ngen bawk. Serchhip Dinthar Branch YMA hnatlang hi Dinthar VC ten an telpui bawk a ni.