Serchhip District-a Police te tan an hnathawhna a thil pawimawh inzirtirna neih a ni
.jpeg)
Serchhip SP Conference Hall-a he training hawnna hi Serchhip SP Stephen Lalrinawma chuan hmanpuiin Police Hqrs. atanga ruahmanna siam angin tun sawrkar kum kal mekah quarter tin In-Service Training hi an neih thu sawiin, a hnuhnung ber tur neih leh theih a ni ta chu lawmawm a tih thu a sawi a. Kumin chhunga hetiang training hrang hrang an buatsaih ah hian Police ten an hnathawhna kawnga thil tangkai tur nia an hriat te thupui hrang hrang hmangin intuaitharna an lo neih tawh thin thu sawiin, Police te chu mahni tan chauh ni lo, midangte tana hna thawk thin an ni tih a sawi a, chung an hna thawhna kawng hrang hrangah tha zawka hna an thawh theihna tura intuaihriam zel an mamawh thu a sawi bawk. Serchhip SP chuan tumah Dan chunga leng an awm lo tih sawiin, Dan lekkawhtu Police te ngei pawh dan bawhchhia an awm chuan man theih an nih thu a sawi bawk.
He Training hawnna hi Course Co-Ordinator SI Lalnunzira, 2nd RO SP Office chuan kaihruaiin Serchhip, Thenzawl leh North Vanlaiphai atangin Police-a thawktute an tel a. Resource Person atan mi hrang hrang hmangin I&PR Department-a Deputy Director leh Serchhip DIPRO K. Saitluanga chuan ‘NGOs/Media, their Co-operation with Police’ tih thupui hmangin thu a sawi a. Tunlai ah Media a thang nasa em em tih sawiin, Print leh Electronic Media tia kan lo sawi thinte bakah New Media huang, Social Media platform tam tak mitin hman theih kan nei ta a, heng hmanraw chi hrang hrangte hi tangkai taka hman thiam a tul thu a sawi a. “Mipuiten kan hnathawhte min hriatsaka, min tanpuia, min pawmpui theih nan kan Media te kan hmang uarin kan hmang tangkai thiam tur a ni a. Khua leh tuite hnena an tana kan hnathawhte hrilh hriat hi mahni infakna anga ngaih tlat tur a ni lova, khawtlang leh ram muanawm zawk a awm theihnana kan thawhho zelna ah a tangkaiin, inrintawnna te min siam sak tel zawk a ni,” a ti a. Mipuite aiawhtu NGO hruaitute nena inpawhna tha buatsaih thiamte, Media hmanga mipuite hnena kan hnathawh hrilhhriatte, mipuite hriattur dan inzirtir lam uar te a tul em em a ni, tiin NGO leh Media te nena inpawhna tha a awm tulna leh hmalak dan turte a tarlang a ni.
Tun tum Training-ah hian Police te tan chhungkaw inelna tha neih dan tur te, Office-a hna pawimawh hrang hrang thawh dan tur te, Traffice Rules leh MV Act chungchang te, thubuai chhuina atana hriat tur pawimawh hrang hrang te, mimal hriselna vawnna atana thil tul te leh District inrelbawlna a Police te pawimawhna te zirho a ni dawn a ni.
Comments
Post a Comment