Zirlai naupang thiamthil pholanna atan Serchhip-ah Block Level Rangotsav Competition neih a ni

Zirlai naupang ten an zirlaibu baka nitin khawsakna kawnga thil pawimawh te an thiam theihna tura ruahman, Block Level Rangotsav Competition (for Elementary School) chu nimin khan Serchhip AOC Veng-a Midland M/S-ah neih a ni.
Samagra Shiksha Serchhip District buatsaih he Competition puala inkhawm tawi Serchhip BRC-a Coordinator J. Lalmuanpuia kaihhruaia neih ah Serchhip BRCC chuan Block Level Rangotsav Competition (for Elementary School) hi East Lungdar Block-ah neih a nih tawh thu sawiin, nikum lamah pawh neih a lo nih tawh thu leh nikum lamah zirlai naupangte tan Mizo infiamna chi hrang hrang hmanga intihsiakna neih a nih thu a sawi a. Kumin hian Middle School zirlai naupangte tan Thing leh mau hmanga thil siam leh Hnang leh Hruihnang hmanga thil insiamsiak bakah Primary School-a zirlai naupangte tan lemziak-a cheimawi-ah intihsiakna neih a nih thu a sawi a. He inelna nei tur hian hun chawpchilh takah inbuatsaihna kalpui a nih thu sawiin, naupang ten phur viau mah se Zirtirtu ten an phurpui loh chuan sang tak thlen theih a nih loh avangin he hun phurpuitu Zirtirtute chungah lawmthu a sawi bawk a ni.

Middle School zirlai naupangte tana Thing leh Mau; Hnang leh Hruihnang hmanga intihsiakna ah hian Zirlai 29 telin Primary School zirlai naupangte tana Lemziak leh cheimawi a intihsiakna ah hian zirlai naupang 32, an vaiin zirlai naupang 61 an tel a. Primary School zirlai naupangte tana lemziak leh cheimawi intihsiakna ah hian K. Lalrinkima, Hmuntha P/S chu pakhatna niin Ruthi Lalthazuali, Bungtlang P/S-I chu pahnihna leh Lallawmpuii, Khumtung P/S-I chu pathumna an ni a. Hnang leh Hruihnang hmanga thil insiamsiam-ah Vanneihsanga, Govt. Chhiahtlang M/S chu pakhatna niin Zothansanga, Govt. Chanmari M/S chu pahnihna leh Lalhruaizela, Hmuntha M/S chu pathumna an ni a. Thing leh Mau hmanga thil insiamsiak ah Ramdinfela, Ramlai M/S Serchhip chu pakhatna niin Malsawmkimi, Ramlai M/S Serchhip chu pahnihna leh Lalramchhana, Govt. M/S Serchhip chu pathumna a ni a. Intihsiakna hrang hranga pakhatna hian lawmman ah Rs. 3000/-, pahnihna in Rs. 2000/- leh pathumna in Rs. 1000/- theuh dawngin an thil siamna senso leh an kalman te pek theuh an ni bawk.