MJA (SD) leh Assam Rifles in Sipai tan tum Mizo thalaite tan inziahluhna hun buatsaih
Serchhip-a awm mek Assam Rifles te leh MJA Serchhip District te hian February ni 21, 2023-a inkawmhona an neih tuma ruahmanna an lo siam tawh, Mizo thalai Sipai-a tang duhte tan hun tha buatsaih a, Online-a Application Form thehluh bakah, sipai tan tum thalai te kawng hrang hrang a tahhriam an nih theih nana hmalakna chu a bul tanna atan Inrinni khan Serchhip-a 42nd Assam Rifles Battalion hmunah Assam Rifles bakah Indian Army-a tang duhte tan Online-a inziahluhna hun leh Pre-Medical Test Programme neih a ni a, he hun hi Mizo thalai engemaw zatin hmang tangkaiin Online Registration ti turin an kal a, an zinga mi 5 te chuan Registration hi an ti thei a, Aadhaar Card leh Phone number thlunzawmloh avanga ti thei lo engemaw zat an awm bawk a ni.
Online-a Registration tihna hun hi Vawiin, March ni 13 hian chawhma dar 10:00 atangin chhunzawm leh tura ruahman a ni a, Serchhip Press Club leh Assam Rifles Camp-ah te pan theih niin Mizo thalai Sipai-a tang duh te chu he hun hi hmang tangkai turin MJA Serchhip District leh Assam Rifles te chuan an sawm nawn leh a ni. Tun dinhmunah Assam Rifles-a intlar tum te tan Tribal Certificate, Residential Certificate, Educational Qualification lanna Certificate, Aadhaar Card (Phone number nena thlunzawm sa), Passport Size photo leh Email Address lo inrin tur a ni ang. He hunah hian Assam Rifles bakah Indian Army-a luh tum te tan pawh Registration tih nghal theih a ni bawk ang.
Kumin May ni 1-a Assam Rifles lakna neih leh tura ruahman ah hian Mizoram bikah Post hrang hrang 21 atangin hna ruak 88 lak tur a awm a, thiamna lamah a hniam berah pawl 10 atanga intanin, Post hrang hrang leh Qualification hrechiang duh chuan MJA Member te hnenah zawhfiah theih a ni.
MJA Serchhip District Memberte chuan Inrinni khan Assam Rifles Unit Hospital-a RMO pawh kawmin Medical lam zirlaite tana Sipai tan a hlawkna leh a kalkawng te an sawipui a, he inkawmhona ah hian Medical lam zirchhuak Sipai a tang duhte tan hmalak a tanho dan ngaihtuah nise an ti bawk.
Comments
Post a Comment