Lenkawl

Serchhip District Executive Force (DEF) a thawklai mi pahnih te chu Mizoram-a Police te chawimawina ‘DGP's Commendation Disc’ dawng tura thlan an ni.

Kum 2023 chhung khan Serchhip District chhunga Police Station hrang hrangah thubuai 175 ziahluh niin heng zingah hian rukruk leh a kaihhnawih a tam ber a. Nikum chhung vek khan dan lova tawlh nia hriat Kuhva rah bag 1032 manin hmun hrang hrangah Dan hmanlai pawimawh inzirtirna hun an buatsaih bawk a ni.

Mizoram sawrkar chuan Inthlanpui neih hmaa Mizoram Civil Service Officer thenkhat te awmna hmun a siksawi chu ti danglam lehin a hmaa an awmna hmun-a awm leh turin a ti a. Hemi ang hian Serchhip Addl. DC Lalnundika chu Aizawl ah DRDO Project Director hne chelh tura sawn leh niin he hna chelh mektu James Lalnithanga chu Serchhip-ah a rawn awm leh dawn a ni.

Ministry of Education leh Ministry of Defense tangkawp buatsaih Republic Day puala ram pum huap inelna ‘National School Band Competition’ neih turah Govt. Mizo High School, Aizawl chu tel ve tura thlan an ni.

Chief Minister hlui Zoramthanga fapa Ramthan-siama chuan Kolkata Ballygunge Mizoram House leinaa inhnamhnawiha puhtute man chhuah an niha dan anga hrem an nih theihnan nimin khan Aizawl District Court-ah Criminal Complaint a thehlut.

Myanmar-a Sawrkar Sipai leh Mipui Sipai te inkahna avanga niminpiah-a Mizoram chhung Lawngtlai District-a rawn lut Myanmar Sipai mi 277 te chu nimin khan Parva leh Zochachhuah atangin Truck hmangin Lunglei panpui an ni a, nizan khan Lunglei hi thlenpui hman beisei niin an kalpui zel dan tur hriat ni lo mah se Lunglei atang hian Helicopter-a hruaichhuah an ni rin a ni.

Nimin khan Saitual District-a SP Office ah lirnghing a lo thlen thulha chhiatna thleng thei laka chhanchhuah leh chhawmdawl hna thawh dan tur a tak anga tihchhinna hun, Mock Drill neih a ni a, Saitual Bawrhsap Dr. Lalngura Tlau chuan mock drill neih a mawhphurtute, khaw-tlang hruaitute leh School leh College hotute leh NDRF hnenah lawmthu a sawi a ni.

Khawzawl District Bawrhsap K. Lalrohlua chuan nimin khan Tualpui RMSA High School tan Tualpui VC kaltlangin Computer Set a hlan a, he School-a zirlai ten Study Camp an neih chhung atan thingpui an inna tur a pe nghal bawk. Khaw-zawl DC hian nikum Dec. 19 khan Tualpui khua hi a tlawh a, hemi tum hian Govt. Primary School leh RMSA H/S te hian Computer full set leh Printer an mamawh thu lo thlenin, Bawrhsap hian Govt. Primary School hnenah Computer set hi a hlan nghal a, nimin khan RMSA H/S tan hian Computer leh Printer hi a hlan leh ta a ni.

Mizoram sawrkar-a Health Minister Lalrinpuii chuan niminpiah khan Union Health Minister Mansukh Mandavya chu kawmin Zoram Medical College (ZMC) in hma a sawn zel dan turte a thlen a. Central sawrkar chu theihtawp chhuahpui tura ngenin, Sawrkar tana a hautak lutuk dawn chuan Central sawrkar kuta hlan mai tha ni-a an hriat thu a thlen bawk. Union Health Minister chuan Mizoram sawrkar chu tha taka thawhpuia theihtawpa tanpui a inhuam thu sawiin, State sawrkarin an kalpui chhunzawm theih nan a bik taka puihna 'Special package' pek an nih tur thu in a chhang a. Health Minister hian Chief Minister Lalduhoma rawn nghalin, Special Package chu Project te siama bawhzui tum a ni.

India rampuma tualchhung sawrkar thuam chak tura hmalakna, Rashtriya Gram Swaraj Abhiyan (RGSA) chungchang inhrilhhriatna chu nimin khan Kolasib-ah neih a ni.