Nikum chhunga Serchhip District-a thubuai ziahluh zingah ruk ruk kaihhnawih a tam fal leh hle

Kum 2023 chhung khan Serchhip District chhunga Police Station hrang hrangah thubuai 175 ziahluh niin heng zingah hian rukruk leh a kaihhnawih a tam ber a. Nikum chhung vek khan dan lova tawlh nia hriat Kuhva rah bag 1032 manin hmun hrang hrangah Dan hmanlai pawimawh inzirtirna hun an buatsaih bawk a ni.

Serchhip SP Office atanga thu kan dawn danin nikum (2023) chhunga Serchhip District chhunga Police ten thubuai an ziahluh 175 zinga 147 te chu IPC hnuaia thubuai ziahluh niin a dang 28 te chu Non-IPC (Local & Special Laws) hnuaia ziahluh a ni a. Thubuai ziahluh zingah hian thubuai 155 te chu chhui zawh tawh niin Chargesheet siam a ni tawh a, thubuai ziahluh atanga chhutin za zela 88.57 ah te chuan Chargesheet siam ni tawhin thubuai 3 te chu Final Report siam a ni tawh a, thubuai chhui lai 17 ala awm mek bawk a ni.

IPC hnuaia thubuai ziahluh 147 zinga 132 te chu chhui zo tawhin Police te hian Chargesheet an siam tawh a, thubuai pathum te chu Final Report siamin thubuai chhui lai 12 ala awm bawk a. IPC hnuaia thubuai ziahluh zingah hian rukruk kaihhnawih thubuai tam berin thubuai 117 zet chu rukruk kaihhnawih thubuai a ni a, hei hi District puma thubuai ziahluh atanga chhutin za zela 66.85 zet a tling a. Rukruk bakah hian mi tihnat leh a kaihhnawih thubuai ziahluh 6 awmin thubuai ziahluh tam zingah a tel a, Criminal Trespass leh Criminal Intimidation hnuaiah thubuai pali ve ve ziahluh a awm a, tualthah thubuai pahnih ziahluh a nih bakah Mischief, Arson, Outrage leh lirthei chetsualna kaihhnawih ah thubuai pahnih theuh ziahluh a ni a. Jail tang tlanchhuak, Intihhmingchhiatna thubuai, Pawngsual thubuai bakah thubuai dang thenkhat pakhat theuh ziahluh a awm bawk a. Hei bakah hian Inthlan kaihhnawih ah thu dik lo thehdarh kaihhnawih ah thubuai ziahluh pakhat a awm bawk a ni.

Nikum chhunga Serchhip District-a Non-IPC hnuaia thubuai ziahluh 28 zingah hian Zu khapna Dan, MLP Act hnuaia thubuai ziahluh tam berin thubuai 17 zet ziahluh a ni a, Ruihhlo kaihhnawih a man te thubuai siam sakna ND&PS Act hnuaiah thubuai 6 ziahluh ni bawkin Arms Act hnuaiah thubuai pahnih ziahluh a ni a, hursualna laka naupangte venhimna Dan, POCSO Act hnuaiah thubuai pathum ziahluh a ni bawk.

Nikum chhunga MLP Act hnuaia thubuai ziahluh 17 kaihhnawih ah hian mi 17 man awmin thubuai ziahluh zinga 15 te hi Serchhip Police Station-a ziahluh niin a dang pahnih hi Thenzawl Police Station hnuaia ziahluh niin North Van-laiphai Police Station hnuaiah thubuai ziahluh a awm lo thung a. Nikum chhung khan tualchhung siam Rakzu litre 291 man niin Sapzu Um 5, litre 3.75 man niin Beer cans 3120 man a ni a, hei hi litre 1560 nia chhut niin Zu leh a kaihhnawih an man hrang hrang te hi tualchhung rate-a chhutin Rs. 8,88,800/- man nia chhut a ni.

Nikum chhunga ND&PS Act hnuaia thu-buai ziahluh ziahluh 6 zinga 4 te hi Serchhip Police Station-a ziahluh niin Thenzawl leh North Van-laiphai Police Station-ah thubuai pakhat ve ve an ziaklut bawk a, Heroin No. 4 gram 731.26 manin Rs. 14,29,000/- man nia chhut a ni a, Methamphetamine kg. 5.32 manin Rs. 35,10,500/- man nia chhut a ni a, ruihhlo an man hi Rs. 49,39,500/- man nia chhut niin heng kaihhnawih ah hian mipa 9 leh hmeichhia pahnih, an vaiin mi 11 man an ni.

Serchhip District chhunga Police te hian nikum (2023) chhung khan Dan lova phurh nia hriat Kuhva rah pawh bag 1032 zet an man bawk a, hei hi Rs. 33,93,500/- man vel nia chhut niin heng Kuhva rah an man te hi a vaiin Custom Preventive Force te kutah hlan a ni.

Nikum chhung vek khan Serchhip District Police te hian District chhunga zirna In leh Kohhran Biak In hmun 14-ah Dan pawimawh inzirtirna an buatsaih bawk a, heng hunah hian zirlai 1166 leh thalai 166 an tel bawk a ni.

Comments

Popular News (Last 30 Days)

LPG man bithliah thar