RGSA chungchang inhrilhhriatna hun hman a ni

India rampuma tualchhung sawrkar thuam chak tura hmalakna, Rashtriya Gram Swaraj Abhiyan (RGSA) chungchang inhrilhhriatna chu nimin khan Kolasib-ah neih a ni.

Kolasib DC Conference Hall-a he hun hman hi District Bawrhsap John LT. Sanga chuan hmanpuiin RGSA-in a tum ber chu tualchhung sawrkar, mipui rorelna (democracy) bulthut, Village Council (VC)-te tha tihchak a nih angin leh VC-te tel lova khawtlang hmasawnna hna thawh a kal theih loh avangin Department-te'n VC-te thawhpui thiam a pawimawh thu a sawi a. RGSA chu Mizorama kalpuitu ber Local Administration Department (LAD) a nih rualin, Department hrang hrangin an hriatpui a, an tel ve a an hmalak ve theihna tur an hriatchian theih nan he hun hi buatsaih a nih thu a sawi a ni.

RGSA hi Ministry of Panchayati Raj hnuaia Centrally Sponsored Scheme niin, hmasawnna ngelnghet leh tlo zawk a awm theih nana tualchhung sawrkarte tihchak leh tihhmasawnna tura ruahman a ni a. Tualchhung sawrkar fawng vuantute theihna leh thiamna haichhuah leh tihpun a nih theih nan training hrang hrang hmanga hmalak niin, mahni a ro inrel thei tur te, an khua/veng a sawrkar hmalakna hrang hrang tangkai thei ang bera an chhawr thiam theihna tur te, mi dang puihna mamawh lova mahni a sum thawkchhuak thei turte a zirtirna leh puihna pek an nih bakah, hna thawk thate tan lawmman te pawh siam thin a ni.

Mizoram-ah chuan RGSA hnuaia hmalakna hi LAD-in kengkawh in, tualchhung sawrkar VC-te tan hmalakna hrang hrang kalpui a ni a. Kum 2023 December ni 11 thleng khan RGSA kaltlangin Mizoram pumah Panchayat Bhawan (VC House) thar 150 sak niin, 93 cheithat a ni a. Common Service Centre (CSC) 15 din niin, VC hrang hrang hnenah Computer Set 243 sem a ni bawk a. RGSA hnuaia Economic Development & Income Enhancement Project kaltlangin hna lian tak pathum - Arecanut Leaf Plate Production Centre, Bilkhawthlir (cheng nuai 49 project); Rural Homestay & Agro-Tourism Project, Tuipui D (cheng nuai 84 project) leh Handloom Design Training cum Production Centre, Thenzawl (cheng nuai 141.23 project) te thawh zawh tawh a ni a. Hnahthial, Khawzawl leh Saitual-ah te District Panchayat Resource Centre (DPRC) sak hna kalpui mek a ni bawk.

Kolasib District bikah RGSA hnuaia hmalaknaah Panchayat Bhawan sak thar 22 leh cheithat 14 awmin, VC 10 chuang hnenah Computer Set pek a ni a; Pangbalkawn, Bairabi North leh Saiphai-ah te CSC din a ni bawk. India ram puma tualchhung sawrkar tha lawmman, National Panchayat Award sem thinah kum 2021 khan Kolasib Venglai VC chuan Gram Panchayat Development Plan Award (GPDPA) dawngin, he Award hian pawisafai cheng nuai 5 a keng tel a ni.