Lenkawl

Nimin khan Serchhip District-ah COVID-19 hri kai mi pakhat hmuhchhuah leh a ni a, nikum December 12 hnu lama Serchhip District-a COVID-19 hri kai hmuh leh hmasak ber niin Aizawl tihloh District zinga COVID-19 hri kai enkawllai awmna awmchhun a ni leh ta bawk a, hri kai hmuhchhuah hi Thenzawl PTS mi niin tunhnaia State pawn atanga rawn lut a ni. Heti hian Serchhip District-a COVID-19 hri kai hmuh tawh zawng zawng chu 14,617 an ni ta bawk a ni. Inrinni khan Aizawl District-ah COVID-19 hri kai mi pahnih hmuhchhuah an awm belh leh bawk a, heng te nen hian Mizoram-ah COVID-19 hri kai enkawllai mi 9 an awm leh ta a ni.

Ngopa Village Council chuan an hnathawh that avangin Best Panchayat Award 2023-ah lawmman pakhatna chu Vawiin hian an dawng dawn.

Serchhip District Executive Force Chhingchhip Police Out-Post a duty te chuan Inrinni zan khan Hmuntha Road-ah dan lova Kuhva tawlh bag 180 zet leh lirthei panga (5) an man leh a. Kumin chhungin April ni 10 thleng khan Mizoram Police te chuan dan lova kuhva tawlh hi bag 7,435 zet an man tawh bawk a ni.

Tuikum Assembly Constituency huamchhunga YMA te leh Ngentiang leh Chhingchhip PHC tan Social Welfare Minister Er. Lalrinawma chuan Inrinni khan Formasa India Foundation kaltlangin Oxygen Concentrator a hlan.

Govt. Serchhip College, Department of Geography-a 6th Semester zirlaite leh Zirtirtute chuan Zirtawpni khan Tropic of Cancer line in Serchhip District-a Hmawngkawn khua a paltlangna lai rîn in, a chhinchhiahna an tar nghal bawk.

Mizoram Football Association (MFA) buatsaih Mizoram District hrang hrangte Football-a inelna MFA Cup vawi 21-na chu Vawiin hian Khawzawl-ah khelh tan a ni dawn a, District 9 an tel ang. Serchhip District aiawha khel tur FC Serchhip Kawnpui te chuan Inrinni khan Khawzawl hi thlengin naktuk-ah Mamit District nen an inhmachhawn dawn a ni.

Serchhip District Volleyball Association buatsaih ‘Age Group Volleyball Tournament’ chu Inrinni khan khelh zawh a ni.

Tunhnaia khua a lum zual mek karah boruak pawh tum dang aiin a thianghlim lo zual tih Mizoram Pollution Control Board chuan an chhinchhiahna atanga a lan thu an sawi a, nimin khan boruak thianghlim lam chu a tehna ah 130 kaiin, Air Index Quality standard tehfung indawt danah, a pathumna, Moderate category a kai pha a, hei hi State danga khawpuite ai chuan la hniam hle mahse, nikum tun ang hun tho a Aizawl khawpui boruak thianghlim lam tehfungah chuan 50 hnuai lamah a awm tih an sawi a. Aizawl khawpui boruak thianghlim loh dan chu tunhnai ah a zual deuh avangin hriselna lam tha lo deuh leh thawk lama harsatna neite tan chuan harsatna thlen thei a nih thu an sawi a ni.

India leh Bangladesh inrina Kawrpuichhuah a Lei dawhkaina tur sum hnuh let tak chu thla thum (3) chhunga a ram chungchang tihfel a nih loh chuan a liam hlen an rin thu Central PWD hotute chuan an sawi.

Inrinni zing dar 10:30 vel khan 23 Sector Assam Rifles te chuan Champhai District chhunga Mizoram leh Myanmar inrina hnaih Zokhaw-thar Lei bula khualzin phur, Maxi Cab ding pakhat an endik atangin ralthuam an man a, heng an man te hi Ulhbun mu 1,100; silai kahtlang theih loh (Bullet Proof plate) 12, Bullet Proof Jacket 10 leh Combat Dress set 1 bakah Alprozolam mum 14,625 te a ni. Maxi Cab khaltu Lalrinsanga, Dawrpui Aizawl ni-a inchhal chu man nghal niin an thil mante hi Inrinni khan Zokhawthar Police kutah an hlan nghal a ni.