Thla 3 hnuah Lei dawhna tur sum a liam hlen ring

India leh Bangladesh inrina Kawrpuichhuah a Lei dawhkaina tur sum hnuh let tak chu thla thum (3) chhunga a ram chungchang tihfel a nih loh chuan a liam hlen an rin thu Central PWD hotute chuan an sawi.

He lei dawh hna vil tur leh enkawl tura Sawrkar laipuiin Agency atana a ruat, Central PWD hotute chuan, Ministry of Home Affairs lamin lei dawhna tur sum Rs. 54,05,86,600 a pekchhuah hnuah Lei dawhkai a rem lohna a awm loh thu hriattirna, NOC pek an ni nghal tih an sawi a, hemi hnu hian hna an tan mai thei turah an inngaih laiin, a dawhna hmun tura chhungkaw thenkhatten zangnadawmna an phut tak avangin harsatna an tawk chho tan ta niin an sawi a ni.

Central PWD hotute chuan, zangna-dawmna pek hrim hrim chu an tan buaina a ni ber lo tih sawiin, a tirah hma lak tan a nihna hmun chu an ram anga chhal an awm mai loh avang leh tuna ram neitu nia inchhal leh si te pawhin document fel tak an nei lo ber chu an buaina a nih zawk thu an sawi a, ram chungchanga buaina hi chinfel thuai a nih chuan a hranpaa dilna siama requisition an thehlut leh hnuah sum hnuhlet tak pawh pekchhuah leh theih mai a nih an rin thu an sawi a. Chutiang ni lova thla 3 chhunga a ram chungchang buaina a fel loh erawh chuan Lei dawhna tur sum hi a liam hlen tawh an rin thu an sawi bawk.