Ngopa in lawmman pakhatna dawng zawk dawn

Ngopa Village Council chuan an hnathawh that avangin Best Panchayat Award 2023-ah lawmman pakhatna chu Vawiin hian an dawng dawn.

Best Gram Panchayat-ah hian Mullusoge (Karnataka) chu lawmman pakhatna dawng tura thlan niin Ngopa chu pahnihna leh Milak Amawti (Uttar Pradesh) chu pathumna dawng tura thlan a ni bawk a.aherawh chu Mullusoge hi Panchyati Raj Institution hnuaiah Urban Local Body an lo nih si avangin Ngopa zawk hian lawmman pakhatna hi an dawng dawn a, lawmman atana cheng nuai 125 dawng tura ngaih pawh cheng nuai 150 an dawng ta zawk dawn nia thudawn a ni bawk.

Ngopa Village Council President K. Lalremsiama chuan Panchayat Award hnen atanga thu an dawn danin Sustainable Development goal hnuaiah VC hnathawk tha nia hriatte chu an hmalakna te zawh an niin an hnathawhte chu a thlalak nen an enfiah hnuah Ngopa chu India rama Panchayat/VC hnathawk tha lawmman dawng tur atan thlan a ni ta niin a sawi a. Mizoram-a VC pakuate chu Local Administration Department chuan hnathawk tha nia hriain Award dawng tur hian a rawt nia an hriat thu a sawi bawk. Ngopa VCP chuan hetiang lawmman an dawng thei chu an lawm hle tih sawiin, khawtlang tanrualna vang nia a hriat thu leh Award-in a ken tel pawisafai pawh tangkai taka hman an tum tih a sawi bawk. Mizoram sawrkar chuan lawmman dawng tur hian mi pathum kalna tur a ruahmansak a; amaherawh chu, Ngopa VC-te hian anmahni sensoin an vai hian Zirtawpni khan Delhi an pan a, Inrinni khan rehearsal neiin Vawiin ah lawmman hi an dawng ang.

Chief Minister Zoramthanga chuan Ngopa VC-ten India rama VC/Panchayat awm zawng zawng 6,40,000 chuang zinga hna thawk tha tehna chi hrang hrang paltlanga dinhmun ropui tak a luah chu a lawmpui thu a sawi a ni.