Lenkawl

Kum 11 hnuailam te tana inelna, Mini National Badminton Championship 2022 khelh tura Mizoram aiawh tur mi 4 thlanchhuah zingah Serchhip mi pahnih an tel.

India ram zalenna sualtute chawimawina kawngzawh leh anmahni zahna lantirna atana Hnam Lam entirna chu nimin zing khan Serchhip-ah neih a ni.

Serchhip P&E Veng-a LPG Home Delivery kalpui a nih hnuah Serchhip-a Veng dang pathum-ah LPG Home Delivery hi kalpui leh tum a ni.

Tunkar Zirtawpni zan atanga Pathianni zan thleng awh tur Salvation Army thalai khawmpui lian, India Eastern Territory (IET) Salvation Army Youth (SAY) Congress vawi 26-na Serchhip in a thlen tur atana Serchhip P&E Veng Leisekawt Mual-a Pandal sak chu nizan khan Pathian hnena hlanna inkhawm neih a ni a, Kohhran hrang hrang atangin chhimtu an thahnem hle.

Serchhip District chhunga PHC leh Health & Welness Centre (Sub-Centre tih thin) hrang hranga Health Mela neih tura ruahmanna kal mekah nimin khan hmun 7-ah Health Mela hi neih a ni.

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhunga Chhingchhip Mualpui leh Phulmawi khua ah Health Clinic Centre thar a hawng.

Nimin khan Mizoram-ah COVID-19 hri kai enkawllai mi 23 te chu anmahni enkawlna hmun atanga chhuahtir an ni leh a, nimin-ah hri hmuhchhuah mi 2 chhinchhiah belh leh an ni bawk. Heti hian nimin tlai thleng khan Mizo-ram-ah hri kai enkawllai mi 13 an la awm mek a, heng hri kai enkawllai la awm te hi Aizawl District-ah mi 9 leh Lunglei District-ah mi 4 niin District 2-ah hri kai enkawllai an la awm a ni.

National Institute of Technology (NIT) Mizoram chuan nimin khan NIT Auditorium, Mizoram University, Tanhril-ah Convocation vawi 6-na hmangin Governor Dr. Hari Babu Kambhampati  chuan khuallian niin a hmanpui a, he hunah hian zirlai 158 in degree dawngin an zinga 126 chu Bachelor of Technology (B.Tech) niin zirlai 26 in Masters of Technology (M.Tech) leh zirlai 11 in Doctor of Philosophy an dawng a ni.

All India Cooperative Week vawi 69-na chu nimin khan Aizawl Vanapa Hall-ah hman niin Cooperation Minister C. Lalrinsanga chuan khuallian niin a hmanpui a, ram sum leh pai dinhmun hmasawn zelna turin Cooperative Movement nasa zualin kalpui a ngai tih sawiin, Cooperative Society leh Movement darhzau leh than zelna tur ngaih pawimawh a hun hle tawh tih a sawi bawk. All India Cooperative Week hi India Prime Minister hmasa ber Jawaharlal Nehru hriatrengna atan kum 1953 atanga hman thin a ni.

Sports Minister Robert Romawia Royte chuan nimin khan Aizawl Chhinga Veng, Saron Veng leh Tuithiang Veng inkalpawhna lei, Lalat Bridge tia vuah chu a hawng a, Lei siam a nih theihna atana ram petute chungah lawmthu a sawi bawk. Lalat Bridge hi Saron Veng, Tuithiang Veng leh Chhinga Veng inkalpawhna laia awm niin, RCC framed structure-a siam a ni a. State Fund atanga dawh niin Expenditure Sanction Amount hi cheng nuai 200 a ni a. Lei sei zawng hi metre 76 niin a zau zawng hi metre 5.50 a ni.