Veng 3-ah LPG Home delivery kalpui leh tum a ni
Mizoram sawrkar in AMC Area leh District khawpui-ah eirawngbawlna Gas Home Delivery kalpui tura ruahmanna a siam bawhzui dan tur chungchangah nimin khan Serchhip District Civil Supply Officer (DCSO) Lalthan-mawia hovin a Pisa-ah Mizofed Serchhip Branch Manager bakah Serchhip District Consumers Association leh Serchhip Sub-Hqrs. YMA hruaitute chuan thutkhawm an nei a, he huna tel te hian sawrkar thuchhuak ang hian LPG Home Delivery hi Serchhip Town chhungah a theih anga kalpui tan ve tum nise tiin vawi lehkhat ah a ruala kalpui vek a buaithlak deuh avangin a tahtawlin Veng hrang hrangah kalpui tan nise an ti a. A bul tanna atan New Serchhip Venglai area, Serchhip Chanmari Veng area leh Serchhip Hmar Veng area-ah te kalpui tum nise an ti a ni.
LPG Home Delivery kalpui tur hian heng Veng hrang hrang huamchhunga VC leh YMA te chu hun remchang hmasa ah kawmin thil kalphung tur inhrilhhriatna neih nise tih a ni a, hemi hnu hian Veng dang ah pawh kalpui zui zel tura ruahman a ni. Thudawn danin LPG Home Delivery kalpuina-ah hian Point bik siama eirawngbawlna Gas sem thin chu tihtawp tur a ni a, eirawngbawlna Gas mamawh te chuan order siamin an In-ah dah sak a ni a, tuna rate hmanlai ang chuan Rs. 70/- chawi belh ngaiin a buaipuitu turte pawh insiam a ni bawk. Tun dinhmunah Serchhip P&E Veng-ah LPG Home Delivery hi kalpui mek niin YMA te chuan hemi kawngah hian thuneitute an thawhpui nia thu-dawn a ni bawk.
Comments
Post a Comment