India ram zalenna sualtute chawimawina kawngzawh leh Hnam lam entirna neih a ni

India ram zalenna sualtute chawimawina kawngzawh leh anmahni zahna lantirna atana Hnam Lam entirna chu nimin zing khan Serchhip-ah neih a ni.
India ram zalenna sualtute chawimawina kawngzawh hi Serchhip District Bawrhsap Pisa Tual atanga neih niin kawngzawh bultanna ah hian District Bawrhsap Nazuk Kumar IAS chuan kan ramin zalenna kan neih theih nana beitu rampum huapa mi langsar tak takte kan hriain kan chawimawi thin tih sawiin, nimahsela India ram hmun hrang hrangah, Hnam hrang hrang zingah mahni nunna thapa zalenna sualtu mi chhuanawm tak tak tam tak kan nei bawk thu a sawi a. Chung Hnam tenau zawk leh tribal te zinga Zalenna sualtu mi huaisen tak takte chawimawina ni atan chuan sawrkar laipuiin November ni 15 chu a ruat thu sawiin, he ni hi ‘Janjatiya Gaurav Divas’ tiin Serchhip-ah hman a nih tak thu a sawi a ni.


Bawrhsap chuan Mizote zingah pawh zalenna sualtu mi engemawzat kan nei tih sawiin, chung mite zahna leh chawimawina ni hi hman a nih thu a sawi a. “Anni hote inpekna zarah Vawiin ah hlim takin, zalen takin nun kan hmang thei ta a ni tih hrerengin zalenna min sual chhuah saktute i zahin i chawimawi zel ang u,” tiin Serchhip mipuite a sawm a. Kawngzawh tura kalkhawm College zirlai naupangte chu Mizo lal huaisen leh pasaltha, India ramin zalenna a hmuh theih nana beitute chanchin chhuang taka mite hnena sawi thin turin a chah bawk.

Nimin zing-a Mizo India zalenna sualtute chawimawina hun ah hian zalenna sualtu mi 12 chanchin inziahna Banner pahnih buatsaihin an chanchin tawi chhiarchhuah a ni a. Chung mite chu- Ropuiliani, Denlung lalnu; Lalburha, Sesawng/Vanchengpui lal; Kalkhama, Sentlang/Nisapui lal; Thanruma, Aizawl/ Tanhril lal; Bengkhuaia, Sailam lal; Lalsuthlaha, Sakhan tlang/Longtoroi; Hausata, Kulhrulh lal; Zakapa, Khawhai lal; Nikuala, Chawngtlai lal; Pasaltha Khuangchera, Reiek; Pasaltha Ngurbawnga, Reiek leh Pasaltha Saithawma, Mualvum te an ni.

Zalenna sualtute chawimawina kawngzawh hi New Serchhip College peng thleng neih a ni a, College pengah hian Govt. Serchhip College zirlai naupang ten zalenna sualtute zahna leh chawimawi nan Hnam Lam an entir a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar