Lenkawl

Aizawl Chaltlang Branch YMA-in kum 75 an tlin lawmna atana hma an lakna pakhat, ruang vawnthatna (Refrigerated Mortuary) an bun thar chu nimin khan Bialtu MLA Vanlalhlana’n Chaltlang Thlanmual-ah a hawng a, he mitthi dahthatna hi Veng dang tan pawh hman an phal a ni.

Mizoram-a Police hotulu ber, Director General of Police (DGP) Devesh Chandra Srivastva IPS chuan zan khat riakin Serchhip District a rawn tlawh mek a, nimin tlai khan Serchhip SP Conference Hall-ah tlawmngai pawl aiawhte leh Village Defence Party (VDP) hruaitute nena inkawmna an nei a ni.

AH&Vety Department leh FOCUS Serchhip District hmalakna in Serchhip District-ah Vawkpui vulh leh Vawk note a pun theih nan hmalak mek niin hemi atan hian khaw hrang hrang atangin mi 22 thlanchhuah an ni a, heng mite hi Vawkpui leina tur leh Vawk In sakna tur pe-a tanpui an ni dawn a ni.

Govt. Serchhip College chuan kumin a Annual Sports Week an hman kharna hun nimin khan hmangin he College Principal K. Laldinpuii chuan khuallian niin a hmanpui a ni.

Serchhip District chhunga Police Station hrang hrangte chu mipuiten pawimawha an biak pawh zung zung theihna turin tunhnai khan Mobile Phone pek thar niin hemi ang hian mipui a mamawhte tan Serchhip Police Station chu Phone No. 03838-222528 (Laneline) leh Mobile No. 9233092581-ah te biakpawh theih a ni a. Thenzawl Police Station chu Mobile No. 9233092582 leh North Vanlaiphai Police Station chu 9233092583-ah biak theih an ni a. Hei bakah hian Serchhip IOC Veng-a SP Office pawh Phone No. 03838-222389 ah biakpawh theih a ni bawk.

Serchhip Teachers’ Association (STA) chuan nimin khan Serchhip P&E Veng-a BNRGSK Hall-ah General Assembly an nei a, chawhma lam ah Report hrang hrang ngaihthlak a nih bakah thusawi ngaihthlak niin chawhnu lamah kum 2022-2023 chhunga hruaitu tur thlanna neih a ni a, President-ah Vanlalchanchinthahrilmawia (Govt. Serchhip College), Vice President-ah Samuel Saithuamliana (GHSS), Secretary-ah F. Lalhmangaihsanga (Govt. Serchhip H/S), Asst. Secretary-ah John Lalvenzela (ZM H/S), Treasurer-ah C. Krosthangi (Govt. Ramlai M/S) leh Fin. Secretary-ah R. Lalnunpuii (Briliant HSS) te thlan an ni.

Nimin khan Serchhip District-ah ASF vanga Vawk thi leh Vawk suat awm belh lovin nimin thlenga ASF vanga Serchhip District-a Vawk thi tawh chu 300 a ni a, Vawk 392 suat a ni tawh bawk.

Serchhip District Education Officer (DEO) Lawmawma chuan nimin khan Serchhip-a Shalom Special School chu tlawhin Football, Volleyball leh Net, Basketball, Boxing Glove, Skipping Rope, Thleng thlawh chi leh Ball Pump-na bakah Jersey te a pe.

Mizoram Presbyterian Kohhran-a Senior Department te chuan naktuk Pathianni hmang hian Pastor Bial hrang hrangah khawmpui an nei dawn a, Serchhip Pastor Bial te Senior Department Inkhawmpui chu Serchhip Hmar Veng Kohhran-ah neiin Serchhip Vengchung Bial ten Bazar Kohhran-ah leh New Serchhip Bial ten New Serchhip Kohhran-ah an nei dawn a. Hei bakah hian Chhiahtlang Bial in Venghlun Kohhran Biak In-ah leh Chhiahtlang Kawn Veng Bial in Chhiahtlang Kawn Veng Kohhran Biak In-ah te an nei dawn a ni.

Serchhip District-a COVID-19 hri kai en-kawllai chu mi 30 aiin an tam leh tawh.