Serchhip District-ah Vawk note a pun theih nan AH&Vety Department leh FOCUS ten hma la mek
Fostering Climate Resilient Upland Farming System (FOCUS) leh AH & Vety Department hian heng Vawk vulh tura thlanchhuah te tan hian Training buatsaihin nimin khan a tum thumna atan Serchhip-a AH&Vety Department Training Hall-ah neih leh a ni a, he hunah hian khaw hrang hrang 7 atangin mi 8 telin hemi hmalam hian Training hi tum hnih neih a lo ni tawh a, nimin-a Training hi Serchhip DVO Dr. R. Lalmakthanga chuan kaihruaiin vawk vulh tura thlan te chu a hmasawn zawnga kal tum turin a chah a. Ranvulhna hmun a nih avanga tawp deuh tura kan ngaihna awm thin te chu tihbo a tul tawh thu sawiin, an hmalakna te chu thalaite pawhin ranvulh kawnga hmalak an chakna siamtu ni thei tura thianghlim tak leh felfai taka hmalak tum turin a chah a ni.
Nimin-a Training-ah hian FOCUS Serchhip District atangin Animal Husbandry Manager Dr. Lalruatfela Sailo leh Technical Officer Dr. R. Lalhruaitluanga ten kalkhawmte hi zirtirna an pe a, he hmalakna in a tum ber chu vawk note tharchhuah a pun theihna tur bakah tunlai thiamna hmang tangkaia Vawk vulh a ni tih sawiin, hemi atan hian a In sak dan atanga Vawk enkawl dan thlenga enpui an nih dawn thu an sawi a. He hmalakna hnuaiah hian Vawk In Rs. 3,70,000/- senga sak tur a nih thu leh hemi atanga za zela 75 chu IFAD Loan atanga tum sak tur niin a bak zaa 25 te chu tanpuina dawngtute tum ve tur a ni dawn tih an sawi a. Vawkpui tur Vawk note pawh pakhat Rs. 7500/- zel hisapa 6 pek an nih dawn thu sawiin, hetah pawh hian za zela 85 chu IFAD Loan atanga pek tur niin zaa 15 chu tanpuina dawngtute tum ve tur a nih thu an sawi bawk.
He hmalakna hnuaia Vawkpui vulh tura thlanchhuah mi 22 zinga 8 te hi Serchhip a mi te niin an zinga pakhat hi New Serchhip a mi a ni a, Thenzawl-ah mi 3, Chhingchhip leh Chhiahtlang ah mi pahnih ve ve bakah Khumtung, North Vanlaiphai, Chhingchhip Mualpui, Bungtlang, Keitum, Khawlailung leh East Lungdar-ah mi pakhat theuh te an ni.
Comments
Post a Comment