Mizoram DGP in Serchhip District tlawhin tlawmngai pawl leh VDP aiawhte a kawm

Mizoram-a Police hotulu ber, Director General of Police (DGP) Devesh Chandra Srivastva IPS chuan zan khat riakin Serchhip District a rawn tlawh mek a, nimin tlai khan Serchhip SP Conference Hall-ah tlawmngai pawl aiawhte leh Village Defence Party (VDP) hruaitute nena inkawmna an nei a ni.

He an inkawmna ah hian Mizoram DGP chuan indaihlo tak chungin Serchhip Police ten theihtawp chhuahin hna an thawk thin tih a hriat thu sawiin, “Ka chhuangin an chungah ka lawm em em a ni,” a ti a. “Police indaihlohna thu Vawii-na khawtlang hruaituten in lo thlen hi kei pawhin ka vei hle a, Police post hi za zela 33 vel zet a ruak mek a ni,” tiin Police Quarters repair leh a thar mamawhna a sang hle tih an sawi te, lirthei indaihlohna leh POL lama indaihlohna an sawite pawh a hriat thu leh theihtawpa lo umzui a tum dawn thu a sawi a. “Khawtlang hruaitute min hriat sak tura ka duh che u chu tunhnaia National Crime Report lo chhuakah Mizoram hi misual thiamloh chantir tawhten sual dang an khawihnawn lehna rate a sang fal em em mai a. Tin, Drugs leh ruihhlo dang hmansual kawngah kan sang hle bawk a. Hengte hi a lo hniama sualna kawng tinreng dona lamah nasa lehzuala tlawmngaipawl, khawtlang hruaitute leh kohhrante kan thawh ho that lehzual a tul hle a ni,” a ti.


Mizoram DGP chuan tunhnaiah Central YMA in Central Anti Drugs Squad (CADS) an din chu a lawmawm hle tih sawiin, nasa takin Mizoram in a tangkaipui dawn tih a sawi a, “Chutihlaiin ruihhlo dotute hnena ka ngen duh chu heng kan thalai ruihhlo ngaia talbuai mekte hi misual an ni ngawr ngawr lova, mite sualna tuartu (victim) zawk an ni mah zawk a ni,” tiin “Kawng diklo zawh palhin zui tur diklo an zui palh a, sal-ah an tang a, chhanchhuah a, tanpuia, kawng dik kawhhmuh an mamawh a ni,,” a ti a. Heng kan thalaite kawng dik lova hruai botu ruihhlo zuartute, dan bawhchhetute zawk hi na taka kan hrem theih nan ruihhlo zuar leh tawlhru kan hria a nih chuan rang takin Police hnenah thlen thin turin khawtlang hruaitute leh mipuite a ngen a. VDP hruaituten dilna an thlen hrang hrangte pawh a theih chen chen a ngaihtuah sak tur thu a hrilh bawk.

He inkawmhona hun hi Serchhip District Superintendent of Police (SP) Stephen Lalrin-awma chuan kaihruaiin Mizoram Police lal berin Serchhip a rawn tlawh chu an lawm takzet tih sawiin, hei mai bakah tlawmngai pawl leh VDP te nena inkawmhona a nei chu Police te leh tlawmngai pawlte thawhhona kawng tinrengah a tangkai hle dawn a ni, a ti a. Mizoram DGP Devesh Chandra Srivastva chanchin tlangpui sawiin, “Mizoram DGP a rawn nih hnuah Police Department ten hmasawnna kan hmu nasa em em a, kan vannei hle a ni,” a ti bawk.


Mizoram DGP hova nimin-a inkawmna hunah hian Serchhip Addl. SP Saidingliana Sailo chuan tunhnaia Serchhip District a Police Department dinhmun leh hmasawnna tlangpuite a tarlang a. Chumi hnuah tlawmngai pawl leh VDP hruaitute nen Serchhip District Police Department hma-sawnna tura an rawtna te, an thawhhona kawnga thil pawimawh nia an hriatte sawihona hun an nei a, an mamawh hrang hrangte an thlen bawk a. Hemi hnu hian Serchhip SDPO Kaste Romalsawma chuan lawmthu sawina hun hmangin he inkawmna hi tihtawp a ni.

Serchhip tlawhtu DGP hian nimin khan Aizawl atanga Serchhip rawn lutin nimin vek khan Serchhip Police Station chu a tlawh bawk a, nizan khan Serchhip-ah hian riakin ruahman lawk ang chuan Vawiin chawhma lamah Govt. Serchhip College tlawhin NCC Cadet leh Airforce Wing te a kawm dawn a, hemi hnu hian Serchhip Police Station-a Waiting Shed leh Guest Room te hawngin Serchhip District-a Police te kawmin an harsatna neih hrang hrang te sawipuina hun (Samelan) a neihpui dawn bawk a ni.

Comments

Popular posts from this blog

Volleyball S/F khel dawn