GSC Annual Sports Week kharna hman a ni

Govt. Serchhip College chuan kumin a Annual Sports Week an hman kharna hun nimin khan hmangin he College Principal K. Laldinpuii chuan khuallian niin a hmanpui a ni.
HD. Rosanga Multipurpose Hall-a College Week kharna hunah hian K. Laldinpuii chuan kumin ah harsatna leh buaina lian tawk lova College Week tluang taka an hmang thei chu lawmawm a tih thu sawiin, Sports Week an hmanna tura College Students Union te hmalakna leh thahnem ngaihna chu lawmawm a tih thu a sawi a. Govt. Serchhip College chu NAAC Grade A an nih thu sawiin, hei hi zirlaite leh thawktute pawhin an hlut thu a sawi a, zirlai chungchang thu ah pawh a tam lam ngawt ni lovin quality an ngaih pawimawh thu a sawi a. Zirlaite tan Zirtawpni chawhnu apiangin Co-Curricular Activities chi hrang hrang an neih thin thu leh heng ah te hian zirlaite tana thiamthil chi hrang hrang inzirtirna mithiam zawk te sawma neih a nih thin thu leh hetiang hi uar zawka la kalpui zel an tum thu a sawi.


College Principal chuan zirlai ni mek, thalaite chu an nun hlim taka hmanga tura chahin, amaherawh chu College chhungah zu leh ruih-theih thil avanga nungchang mawilo neih erawh a remchan loh thu a sawi a, College discipline khauh taka an kenkawh zel dawn thu a sawi bawk.


Nimin-a Annual Sports Week kharna hunah hian Annual Sports an hman chhunga titha te hnenah lawmman semna neih niin College Miss atan R. Vanlalawmpuii (3rd Semester BA) leh Mister atan KC. Vanlalruata (1st Semester BA) te thlan an ni a. He hunah hian MJA Ser-chhip District leh MZP Hqrs. Serchhip hruaitute pawhin hmanpuiin thuchah tawi an sawi bawk.

Comments

Popular posts from this blog

Volleyball S/F khel dawn